Në Këshillin e Legjislacionit po diskutohet reforma e re Territoriale, një propozim ky i Partisë Demokratike. I ftuar në mbledhjen e sotme ka qenë kreu i shoqatës së bashkive, Agron Haxhimali, i cili tha se përshëndet nismën për Reformën Territoriale, ndërkohë që u shpreh kundër rikthimit të konceptit të komunave.
“Përshëndes nismën e PD për Reformën Territoriale, sugjeroj që nga 12 rajone të shkojmë në 6. Jam kundër rikthimit të komunave, por kthimin e pushtetit te njësitë rurale, do të mjaftonin 80 apo 90 njësi të tilla”, u shpreh Haxhimali.
Eksperti i shoqërisë civile u përball me socialistin Damian Gjiknuri, i cili e pyeti disa herë, nëse ndryshimet në Reformën Territoriale mund të bëhen apo jo pa ndryshime në Kushtetutë. Sipas Haxhimalit, do të ishte mirë që këto ndryshime të sanksionoheshin në Kushtetutë, në mënyrë që të mos kishte keqpërdorim politik, sa herë që ndryshohen pushtetet.
Sa i takon Reformës së 2013-tës, Haxhimalit tha se disa bashki kanë shumë pak njësi vendore, në krahasim me numrin e madh të popullsisë dhe sipërfaqes që ato mbulojnë, duke humbur kështu përfaqësimin.
Eksperti tha se dhe Tirana ka nevojë për ndryshimin e numrit të njësive, për shkak të shtimit shumë të madh të numrit të banorëve në periferitë e kryeqytetit.
Discussion about this post