Goditjet e gjyqtarëve në ndeshjet e kampionatit shqiptar janë bërë më të vazhdueshme në periudhën e fundit në të gjitha nivelet dhe sot në Kategorinë e Parë, më në fund është vendosur që të pezullohet takimi pas një ngjarje të tillë.
Sfida mes Tërbunit dhe Turbinës është pezulluar në minutat shtesë të saj, pasi gjyqtari ka vendosur në bashkëpunim me delegatin që sfida nuk mund të vazhdohej më si pasojë e dhunës ndaj gjyqtarëve.
Në minutën e fundit të ndeshjes, kur rezultati ishte 1-1, arbitri anësor Xhuljo Mani nga kolegjiumi i Tiranës, ka anuluar një gol të skuadrës vendase. Situatë e cila ka sjellë vërshimin e sendeve të forta nga tribuna, një prej të cilave ka goditur gjyqtarin anësor, i cili më pas është rrethuar edhe nga lojtarët vendas që protestonin furishëm.
Ndeshja është ndërprerë dhe gjyqtarët kanë shkuar menjëherë në dhomat e zhveshjeve. Aty, janë thirrur kapitenët e të dy ekipeve dhe u është komunikuar se ndeshja do të pezullohej në minutën e 93-të nga 9 shtesë të akorduar nga kryesori në fund të kësaj sfide të rëndësishme për mbijetesën për të dy skuadrat.
Pak momente më vonë, Klubi I Tërbunit ka reaguar nëpërmjet rrjeteve sociale për ngjarjen që ndodhi në stadiumin e tij në Pukë ku gjyqtari kryesor Albano Stolaj, ka ndërprerë ndeshjen ndaj Turbinës në minutat shtesë të sfidës.
Klubi pukjan pretendon se ka qenë një vendim i njëanshëm i gjyqtarëve por nuk ka pasur asnjë lloj goditje apo dhunë ndaj anësorit të sfidës si dhe nuk kishte asnjë lloj shpjegimi nga kryesori për vendimin që kishte marrë. Klubi bëri të ditur se ka pamjet filmike të të gjithë ngjarjes që e ka cilësuar si të paprecedent.
“Reagimi i Klubit të Futbollit Tërbuni Pukë për ndeshjen e zhvilluar sot, 01.04.23 mes ekipit tonë dhe K.S. Turbina Cërrik e pa përfunduar pasi arbitri Albano Stolaj ndërpret ndeshjen kur rezultati ishte 1-1 në minutën e 92’ ku ishin akorduar 9-të minuta shtesë.
Ekipi ynë në minutën e 92-të arrin të gjejë golin e avantazhit me anë të sulmuesit, Albi Xhabrahimi por në mënyrë të drejtëpërdrejtë, pa asnjë lloj arsyeje, arbitri anësor e anulon për pozicion jashtë loje. Në atë moment, lojtarët tanë drejtohen tek anësori për të kërkuar shpjegime për golin e anuluar dhe në mënyrë të paprecedent arbitri kryesor Stolaj ndërpret ndeshjen pa asnjë lloj motivi.
Nuk ka pasur në fushë tifozë, nuk ka pasur hedhje të sendeve nuk ka pasur asnjë lloj presioni, nuk ka pasur asnjë prekje ndaj arbitrave, nga askush. Delegatët e FSHF-së i kanë kërkuar llogari arbitrit në fjalë për ndërprerjen e ndeshjes por çuditërisht treshja e arbitrave pa vërshëllyer janë futur në dhomat e zhveshjeve.”- shkruhet në postimin e klubit verior.
Discussion about this post