Sipas ligjit, mbetjet urbane nuk duhet të depozitohen pranë zonave të mbrojtura. Në kuadër të distancës së parashikuar, thuhet se duhet të jenë të paktën deri në 300 metra larg zonave të mbrojtura apo banesave.
Gjithsesi, diçka e tillë nuk është zbatuar në “Krastë-Viron” të Fushë Krujës që është gjithashtu një zonë e mbrojtur që prej vitit 2018.
Banorët shprehen tepër të shqetësuar nga aroma e mbetjeve që depozitohen në këtë zonë të mbrojtur, pasi janë shumë pranë shtëpive të tyre dhe tymi i djegies është i papërballueshëm, aq sa nuk mund të hapin as dritaret për ajrosje.
Banorët e zonës, kanë dërguar edhe letër ndaj kryetarit të Bashkisë Artur Bushit, por akoma asnjë zgjidhje konkrete nuk është ndërmarrë për problemin e tyre.
Kujtojmë, që qytetit i Kavajës para pak muajsh ka pasur një problem të tillë. Një problem që mori fund pasi bashkia e Kavajës kërkoi ndihmë nga bashkia e Durrësit në mënyrë që mbetjet të trajtoheshin në landfillin e certifikuar të këtij qyteti.
Ndërsa bashkia e Krujës nuk ka ndërmarrë një vendim të tillë, duke lënë pa zgjidhje kërkesat e bëra nga banorët e zonës.
