Helmimi i fëmijëve të kopshtit, kryebashkiaku i Gramshit gënjen paturpësisht: S’ka të shtruar

Kryebashkiaku i Gramshit, Besion Ajazi ka folur në lidhje me ngjarjen e rëndë ku disa fëmijë të kopshtit nr.1 në këtë qytet u paraqitën në spital për të marrë ndihmë mjekësore, pasi dyshohet se u helmuan nga ushqimi i kontaminuar me salmonelë. Ajazi, teksa mundohet ta minizmojë skandalin, deklaron se ende nuk ka një përgjigje të saktë se nga ka ardhur ky helmim.

“Shkuam në kopsht dhe morëm mostrat për 78 persona, 53 fëmijë dhe pjesa tjetër personale. 14 persona rezultuan pozitivë. Ka mbërritur dhe AKU dhe drejtori i përgjithshëm që morën mostra dhe priten përgjigjet. Nuk është një rast që na bën mirë. Ne si bashki kontrollojmë fletën e analizave. Nuk ka asnjë përgjigje për analizat, duhen ditë për të identifikuar bakterin.

Nuk është një kompani cateringu. Ka gatim në kuzhinë dhe ai që ushqimi që mbetet derdhet. Por kjo i mbetet hetimit. Situata është në kontroll nga epidemiologët e Gramshit. Dyshimet janë të ndryshme. Mund të jetë nga ushqimi, mund të jetë nga uji dhe higjiena është e certifikuar si brenda rregullave. Mund të jetë dhe i mbartur”, tha Ajazi.

Teksa prindërit e fëmijëve që janë helmuar dolën në protestë ditën e sotme dhe kërkonin siguri për fëmijët, i pari i bashkisë së Gramshit deklaron me paturpësi se asnjë fëmijë nuk është shtruar në spital dhe kërkoi që ngjarja të mos përdoret nga politika.

Prindi i një fëmije që u helmua nga ushqimi në kopësht tregoi se fëmija e tij qëndroi në trajtim me serum për më shumë se 72 orë, duke vuajtur nga të vjella dhe diarre të shpeshta.

“Mediat e kanë tollovitur, duke dhënë informacione të pavërteta. Nuk është rasti që ngjarje të tilla të përdoren për politikë. Të gjitha institucionet janë në këmbë për të ndjekur këtë ngjarje. Nuk ka pasur fëmijë të shtruar në spital. Kanë marrë trajtim mjekësor dhe janë larguar për në shtëpi”, tha kryetari i Bashkisë.

Kujtojmë po ashtu, se Instituti i Shëndetit Publik ka konfirmuar se nga analizat e kryera ndaj 79 fëmijëve në kopshtin e Gramshit, 17 prej tyre kanë rezultuar pozitivë me ‘Salmonella Enteritidis’.