Fluksi i qytetarëve të paraqitur në spitalin e Krujës për të marrë ndihmë mjekësore me simptoma të helmimit është i lartë. Aktualisht në spital janë paraqitur 320 persona. Qytetarët kanë pasur simptoma si: diarre, të vjella, dhimbje barku dhe temperaturë.
Rastet e para janë paraqitur në spital të dielën dhe vijojnë edhe sot. Drejtoresha e spitalit Yllka Shetaj tha se numri i pacientëve është në rritje.
“Ka raste të shtuara të pacientëve që kanë kërkuar ndihmë për shkak të helmimit. Kanë marrë mjekim në urgjencë dhe janë larguar. Nuk dimë nëse helmimi vjen nga uji apo ushqimi, kemi kërkuar të bëhen analiza nga NJVKSH. Nuk mund të them se kemi të bëjmë me helmim masiv”, – u shpreh ajo.
Ndërsa, babai i dy fëmijëve të shtruar rrëfen shqetësimet që kanë pasur fëmijët dhe dyshon se kjo helmim ka ardhur nga uji i pijshëm.
“Ne ujë çezme pijmë, mbrëmë kam pasur djalin e madh me të njëjtat simptoma, tani kam tjetrin. Janë me diarre e të vjella. Edhe unë jam ashtu, por po e mbaj veten” – tha babai i fëmijëve të shtruar.
Janë marrë disa mostra të ujit të rrjetit të cilat janë dërguar për ekzaminim, por përgjigjia nuk ka dalë ende. Policia doli me një njoftim zyrtar për ngjarjen e rëndë ditën e djeshme por raportoi se bëhej fjalë vetëm për 35 të helmuar.
