Nënkryetari i LSI-së Petrit Vasili ka reaguar për situatën e rëndë që ka ndodhur në Krujë ku qindra banorë janë helmuar. Ende nuk dihet shkaku i helmimit masiv, ndërkohë që në spital kanë marrë ndihmë mjekësore 500 persona.
Teksa e cilëson ngjarjet tejet të rëndë Vasili hedh akuza ndaj kreut të qeverisë Edi Rama. “Edi Rama asnjë fjalë për qindra qytetarë të Krujës të helmuar, për të ata nuk ekzistojnë! Ngjarja e Krujës ku qindra qytetarë janë helmuar përben një moment tepër të rëndë. Edi Rama dhe qeveria e tij janë totalisht inekzistent në çdo pikëpamje”, shkruan Vasili.
Referuar informacioneve të publikuara në medie nga organet kompetente Vasili thotë se qeveria po bën propagandën edhe në këtë rast.
“Informacioni zyrtar është vetëm propagandistik dhe pa asnjë element përgjegjësie dhe pa asnjë analizë shëndetësore, por edhe ligjore të detyrueshme”, tha nënkryetari i LSI.
Sipas Vasilit, për situatën e rëndë askush nuk mban përgjegjësi ndërsa kryeministri Rama ka zgjedhur të mos e komentojë ngjarjen, ndërsa nga ana tjetër jeta e qytetarëve është në rrezik.
“Edi Rama, që nuk lë gjë pa komentuar për çdo gjë që ndodh në Europë dhe në botë nuk thotë asnjë fjalë për qindra qytetarë të helmuar. Askush nuk mban përgjegjësi në qeverinë e Edi Ramës ndërsa qytetarëve ju është rrezikuar shumë seriozisht shëndeti. Situata flet vetë. Furnizimi me ujë dhe veprat, që e sigurojnë atë si dhe rrjeti i shpërndarjes e siguria sanitare të ujit të pijshëm janë në mëshire të fatit. Shteti i propagandës nuk garanton as sigurinë minimale të qytetareve për ujin, që ata pinë. Për Edi Ramën qytetarët nuk ekzistojnë”, përfundon Vasili.
Që nga e diela në spitalin e Krujës është regjistruar një fluks pacientësh me simptomat e helmimit, çka ngre dyshime dhe kërkon hetime nga instancat përkatëse për të zbuluar shkakun e helmimit. Deri më tani, ku sot shënohet dita e katërt në spital kanë marrë ndihmë mjekësore 500 persona.
