Për helmimin e mbi 300 banorëve në qytetin e Krujës, ka reaguar deputetja e Partisë Demokratike, Grida Duma. Me anë të një videoje të postuar në facebook, Duma tregon se si kryeministri Edi Rama e inauguronte projektin e ujësjellësit, ndërsa për këtë shkruan se vuajtjet e sotme të krutanëve janë përgjegjësi e shkaktarëve të qeverisjes.
“Mbi 300 numri i të helmuarve nga uji, siç thonë vetë të shtruarit në spitale. Kjo katastrofë ka prekur fëmijë e të moshuar. Vuajtjet e sotme të krutanëve janë përgjegjësi e shkaktarëve të qeverisjes.
Kujtojmë kur pikërisht për ujësjellësin në Krujë, Kryeministri bënte xhiron e cirkut të lëvizshëm të propagandës se vet të neveritshme. Hetimet duhet të zbardhin të vërtetën, kush luan me ujin, luan me jetën” – shkruan Duma.
Kujtojmë se të paktën 370 persona me simptoma helmimi janë paraqitur në spitalin e Krujës. Dyshohet se ata u helmuan nga uji i pijshëm. Mbi 80% e popullatës në Krujë konsumon ujin e çezmës në përditshmërinë e tyre.
