Në mbyllje të vitit dhe në pritje të vendimit të gjykatës për dy kuvendet e organizuara nga Partia Demokratike, një nga kryetari aktual i saj dhe një nga Berisha me mbështetësit e tij, Basha ka organizuar një drekë pune me kryetarët dhe sekretarët e degëve të Partisë Demokratike.
Burime të sigurta nga Gijotina.com bëjnë me dije se dreka është organizuar të hënën rreth orës 13.00 në ambientet e restorantit të njohur “Sofra e Ariut” dhe mësohet se do të diskutohet mbi veprimtarinë e opozitës gjatë ditëve të para të Janarit, e cila është në pritje të vendimit që do marrë gjykata për njohjen ose jo të dy Kuvendeve dhe vendimeve të marra në to, konkretisht më 11 dhjetor të organizuar nga Berisha dhe më 18 dhjetor të organizuar nga Basha.
Po ashtu, Basha, i kritikuar shpesh gjatë muajve të fundit nga Berisha për shkëputjen e tij nga baza, duket se ka ndryshuar filozofinë e të vepruarit dhe ka vendosur që të diskutojë sa më shpesh me degët me qëllim mbajtjen bashkuar të Partisë Demokratike, që po kalon një nga përplasjet më të vështira në 30 vite. Nga ana tjetër, Berisha duket se pas Kuvendit të organizuar prej tij, i cili nuk u njoh nga PD zyrtare, si i organizuar në kundërshti me statutin e partisë, nuk ka pasur ndonjë organizim të tillë.
Një veprim të tillë, Basha e kreu edhe më 10 dhjetor, një ditë para Kuvendit të Berishës, ku mblodhi po për drekë pune kryetarët e degëve të PD. Pas përfundimit të drekës, së bashku me krerët e degëve Basha u zhvendos atë ditë drejt selisë së PD-së në këmbë. Nuk dihet se cila do të jetë agjenda e kryeopozitarit pas drekës së sotme, por mendohet se do të kryejë të njëjtin ritual si 17 ditë më parë./Gijotina.com/
Discussion about this post