Ish-kryeministri dhe kryetari aktual i PD-së, Sali Berisha ka reaguar pas deklaratave të kreut të qeverisë, Edi Rama për trazirat në veri të Kosovës. Sipas Berishës, Rama me heshtjen dhe deklaratat e tij rreshtohet me Putin dhe Vuçiç. Më tej, ai thekson se pasi heshti si “fija e barit”, Rama me qëndrimin e tij doli haptas në mbrojtje të politikës luftënxitëse të Putinit dhe Vuçiçit.
Kryedemokrati shton se Rama, të cilin e cilëson dhe “tradhtar”, po inkurajon konfliktin në Kosovë. Berisha thekson se Rama krijon alibi para ndërkombëtarëve për të mbrojtur mikun e tij Vuçiç, teksa shprehet se janë disa “fshatarë serbë” ata që nxisin konfliktin.
“Edi Rama me heshtjen dhe deklaratat e tij rreshtohet me Putinin dhe serbomadhin Vuçiç!
Të dashur miq, situata konfliktuale në Veri të Kosovës e krijuar nga Putini i Vogël i Beogradit, Aleksandër Vuçiç, i cili kërcënoi me përgjigje vdeksore dhe konflikt qeverinë e Kosovës dhe NATO-n, në rast se do të zbatoheshin marrëveshjet e reciprocitetit për targat dhe letërnjoftimet serbe në Kosove. Pas këtyre deklaratave, dje pasdite dhe në darkë në Veriun e Kosovës banda serbesh u ranë sirenave te luftës, bllokuan rrugët me barrikada dhe shkrehën breshëri armësh mbi Policinë e Kosovës.
Kjo gjendje konfliktaliteti u përball me një reagim të fuqishëm ndërkombëtar, në rradhë të parë të NATO-s, e cila ka në mbrojtje direkte Kosovën dhe, nepërmjet KFOR-it deklaroi se ishte e gatshme të ndërhynte në rast se rrezikohej stabiliteti i Kosovës.
Po kështu reagoi Bashkimi Europian dhe Komisioni Europian me përfaqesuesin e lartë të Politikës së Jashtme dhe Sigurisë, Jozef Borrel, i cili kërkoi heqjen e menjëhershme të barrikadave të vendosura në rrugët e komunave të Kosovës së Veriut dhe vendkalimet kufitare nga bandat e Vuçiç.
Gjithashtu reagoi Ambasada e SHBA-së në Prishtinë, cila e vlerësoi të ligjshme vendimet e qeverisë së Kosovës për reciprocitetin për letërnjoftimet dhe targat e lëshuara në Serbi por kërkoi shtyrjen me një muaj të zbatimit të tyre, kërkesë të cilën qeveria e Kosovës e pranoi.
Reaguan të gjitha forcat politike shqiptare kudo që janë në mbështetje të Qeverisë se Kosovës.
Ashtu siç pritej, në anën e Serbise dhe Vuçiçit u rreshtua menjëhere Putini dhe qeveria e tij, i cili bën gjithçka për nxitjen e konfliktit në rajon.
Por ndaj këtyre kërcënimeve luftënxitëse të serbomadhit Vuçiç, në një akt të turpshëm vasaliteti të plotë ndaj padronit, heshti për 24 orë si fija e barit, Edi Rama.
Kurse pas 24 orëve, ai doli hapur në mbrojtje të Putinit të Madh dhe Putinit të Vogël duke e paraqitur çështjen jo të nxitur nga Moska dhe Beogradi por refuzim të marrëveshjes nga serbët lokal për arsye të tyre.
Kështu, Rama sot në konferencë shtypi deklaroi: ‘’Unë i bëj thirrje autoriteteve në Beograd, Presidentit të Serbisë që të mos ushqejnë më asnjë lloj justifikimi apo alibie për grupe të caktuara në Veriun e Kosovës që për arsyet e tyre i kundërvihen zbatimit të një marrëveshje që jo vetëm duhet zbatuar por është e vlefshme për t’u zbatuar për t’i dhënë më shumë besueshmëri dialogut”.
Me një deklarate të tillë Edi Rama, duke vlerësuar se gjendja nuk erdhi pas deklaratave të Kremlinit për destabilizimin e Ballkanit dhe ultimatumëve të padronit të tij Vuçiç për përgjigje vdeksore ndaj Kosovës dhe kercënimit për konflikt ndaj perëndimit në rast se qeveria e Kosovës do të zbatonte marrëveshjen për reciprocitet, ai i del haptas në mbrojtje politikës luftënxitëse të Putinit dhe Vuçiçit.
Me këtë deklaratë ky tradhëtar inkurajon konfliktin në Kosovë dhe, njëlloj siç justifikon refuzimin nga padroni i tij Vuçiç për zbatimin e sanksioneve të BE ndaj Rusisë, ai i thotë komunitetit ndërkombëtar se nuk është Putini dhe Vuçiçi që nxisin konfliktin por janë disa fshatarë të pagdhendur serb qe nuk duan Albin Kurtin dhe nuk zbatojnë vendimet e qeverisë së tij.
Po kështu, me këtë deklaratë, ky puthador i shpifur i Beogradit i thotë Aleancës së Atllantikut të Veriut se u nxitua me deklaratën e KFOR-it për gadishmërinë për të vendosur stabilitetin në Kosovë, se atë nuk po e kërcenonte Beogradi i nxitur nga Moska por disa fshatarë nacionalistë serb qe nuk duan marrëveshjen dhe vendimet e qeverisë se Albin Kurtit.
Me kete rast, duke mbështetur plotësisht qeverinë e Kosovës, qëndrimin e NATO-s, BE dhe SHBA denoj me forcën më të madhe provokacionet e ulëta të serbomadhit Vuçiç dhe qendrimet e deklaratat e argatit të tij, tradhëtarit të kombit shqiptar Edi Rama”-shkruan Berisha.
Discussion about this post