Sot në seancën plenare të Kuvendit të Shqipërisë u mbajt një minutë heshtje në nderim të akademikut të njohur Rexhep Qosja, i cili është ndarë nga jeta në moshën 89-vjeçare.
Lajmi për ndarjen e tij nga jeta u bë i ditur nga familjarët, të cilët njoftuan gjithashtu se ceremonia e varrimit është zhvilluar në rreth të ngushtë familjar, sipas dëshirës së të ndjerit, pa organizim të ceremonisë publike të pritjes.
Rexhep Qosja ishte një nga figurat më të rëndësishme të albanologjisë dhe studimeve letrare shqiptare. I lindur në vitin 1936 në Vuthaj të Malit të Zi, ai kreu shkollimin fillor në vendlindje dhe më pas në Guci. Në vitin 1959 përfundoi Shkollën Normale në Prishtinë, ndërsa në vitin 1964 u diplomua në Degën e Gjuhës dhe Letërsisë Shqipe në Fakultetin Filozofik të Prishtinës.
Ai ka dhënë një kontribut të gjerë akademik dhe shkencor, duke shërbyer si profesor dhe drejtues studimesh në Fakultetin Filologjik të Prishtinës, si dhe drejtor i Institutit Albanologjik gjatë viteve 1972–1981. Qosja u pranua si asistent në këtë institut në vitin 1967 dhe më pas u ngrit në nivelet më të larta shkencore.
Gjatë karrierës së tij, ai botoi mbi tridhjetë vepra në fushën e studimeve letrare, kritikës, publicistikës, romanit dhe dramës. Ndër veprat e tij më të njohura janë “Vdekja më vjen prej syve të tillë”, “Anatomia e kulturës” dhe romani “Bijtë e askujt”, i vlerësuar me çmimin “Pjetër Bogdani” në vitin 2010. Veprat e tij janë përkthyer në disa gjuhë dhe kanë qenë objekt studimi në qarqe të ndryshme akademike.
Discussion about this post