Ish-Ministrja e Shëndetësisë në Francë, Agnes Buzyn, e cila la detyrën për të garuar në zgjedhje lokale është marrë nën hetim nga autoritetet për keqmenaxhim të pandemisë. Prokuroria franceze deklaroi se Buzyn po hetohet për rrezikimin e jetës së të tjerëve, pasi ishte larguar nga posti i lartë në shkurt të vitit 2020 për të garuar për kryetare të Komunës së Parisit, por që nuk arriti të fitojë. Një gjykatë e posaçme do të vendosë nëse ish-ministrja do të ndiqet penalisht. Ky është një ndër rastet e para në botë që një ministër ose ministre mbahet përgjegjëse para ligjit për menaxhimin e pandemisë.
Gjatë një seance të mbajtur të premten, Buzyn tha se e mirëpret mundësinë për t’u sqaruar dhe për ta vendosur të vërtetën. “Nuk do të lejoj që veprimet e mia ose të qeverisë të diskreditohen, pasi është bërë shumë punë për ta përgatitur vendin për krizën shëndetësore globale”, deklaroi ish ministrja.
Gjykata po i hulumton akuzat për neglizhencë rreth sigurimit të pajisjeve mbrojtëse për stafin shëndetësor dhe paqartësisë gjatë lëshimit të këshillave rreth përdorimit të maskave. Buzyn ishte emëruar ministre e Shëndetësisë në maj të vitit 2017 dhe kishte dhënë dorëheqje vetëm disa javë pas konfirmimit të rasteve të para me Covid-19 në Francë, shkruan BBC.
