Në kuadër të hetimeve për zjarrin tragjik në Koçan, ku humbën jetën 61 persona, autoritetet kanë ndaluar disa figura të larta politike dhe shtetërore.
Mes të arrestuarve janë ish-ministrat e Ekonomisë, Valon Saraçini dhe Bekim Neziri, si dhe ministri aktual pa portofol dhe ish-drejtor i Drejtorisë për Mbrojtje dhe Shpëtim, Shaban Saliu, të gjithë kuadro të BDI-së.
Po ashtu, drejtori aktual i Sigurimit të Shtetit, Xhevat Selami, është gjithashtu i ndaluar, bashkë me punonjës të tjerë të VLEN. Hetimi po zgjerohet dhe përfshin edhe 23 të dyshuar të rinj, prej të cilëve 19 janë ndaluar ose ndodhen në paraburgim.
Një person tjetër, Driton Kuçi, ish-ministër i Ekonomisë dhe aktualisht ambasador i Maqedonisë në Mbretërinë e Norvegjisë, është jashtë vendit dhe nuk është në gjendje të merret në pyetje.
Hetimet janë fokusuar në periudhën që nga viti 2012 dhe kanë të bëjnë me Ministrinë e Ekonomisë dhe Shërbimin e Sigurimit Shtetëror. Dyshimet janë se mund të ketë pasur lidhje shkakësore që kanë ndodhur para zjarrit të 16 marsit në kabarenë “Pulse” në Koçan. Të gjithë ata që kanë mbajtur pozita kyçe si ministra të Ekonomisë dhe drejtorë të Entit Shtetëror të Statistikave që nga viti 2012, përfshirë edhe drejtorin aktual, janë arrestuar në lidhje me ngjarjen.
Megjithatë, ministri aktual i Ekonomisë, Besar Durmishi, nuk është i dyshuar në këtë hetim. Prokuroria Publike e Koçanit është duke vazhduar hetimet lidhur me zjarrin tragjik që ndodhi në “Pulse”, një ngjarje që ka tronditur vendin dhe ka lënë pas një bilanc tragjik.
Discussion about this post