Një politikan i nivelit të lartë dhe një prej biznesmenëve të mëdhenj, i konsideruar si oligark, pritet të arrestohen me urdhër të SPAK.
Gijotina.com ka mësuar se për biznesmenin është vendosur madje edhe masa paraprake e sigurisë nga GJKKO, sipas kërkesës që SPAK ka paraqitur në gjykatë.
Burimet konfirmojnë se politikani është ish-ministër, një prej figurave kryesore në rradhët e të majtës, i hetuar në heshtje nga SPAK prej disa muajsh. Madje mësohet se për momentin ai nuk ndodhet në Shqipëri.
Ndoshta kjo është arsyeja që SPAK po heziton që të vijojë procedurat në rastin e politikanit, i cili ka imunitetin e deputetit dhe për të cilin duhet nga Kuvendi një leje, ashtu si në rastin e ish-zv.Kryeministrit Arben Ahmetaj.
Ndërkohë, që SPAK ka hetuar po në heshtje një prej biznesmenëve më të rëndësishëm, i përfshirë në disa koncensione dhe privatizime, madje strategjike, për të cilin Gijotina.com ka mësuar se është kërkuar në GJKKO caktimi i masës së sigurisë.
Hetimet ndaj oligarkut përfshijnë disa çështje, ndërsa ka dyshime se ka informacione të mbërritura në duart e prokurorëve specialë nga partnerët ndërkombëtarë, pas transkriptimeve të aplikacionit SKYeCC.
Raportohet se dy çështjet, pavarësisht se janë të ndara, janë konkluduar në të njëjtën kohë, ndërsa sipas burimeve akuzat përfshijnë pastrim të parave, evazion fiskal, korrupsion dhe shpërdorim detyre.
Nuk përjashtohet mundësia që operacioni i SPAK të konkludohet për çështje orësh, në drejtim të biznesmenit, edhe pse duket se Prokurorët Specialë, po zvarrisin vijimin e procedurave, ndoshta për të konkluduar njëherazi, të dy rastet.
Discussion about this post