Flamur Noka, Sekretar i Përgjithshëm në PD-në e drejtuar nga ish-Kryeministri Sali Berisha, tha se Ilir Beqaj, ish-ministër dhe shoku i ngushtë i Edi Ramës, është thjesht një anëtar i organizatës kriminale të Rilindjes.
Në emisionin “Kjo Javë”, Noka tha se SPAK është SKAP-I i partisë, ndaj dhe u bë një kujdes i madh që çështja të mos shkonte deri te ministry, në rastin konkret Ilir Beqaj.
“Standardi që po ndjek SKAP është ulëritës. Edhe sot Ilir Beqajn e trajtuan si të ishte kryeministër i vendit. Ndërkohë që Jamarbër Malltezi pse mori pronën e tij, e zhvilloi atë, duke ia dhënë mundësinë e zhvillimit të pronës Edi Rama, i cili firmosi lejet e ndërtimit, u arrestua si të ishte një kriminel, pa i vjedhur asnjë cent qytetarëve shqiptarë, ndërsa Beqaj që vjedh qindra miliona euro me sterilizimin, trajtohet si i paprekshëm. Ky është standardi që ka drejtësia e re politike”, tha Noka.
Ai u shpreh se 6 ligjet e miratuara nga Edi Rama, pas miratimit të reformës në drejtësi, synonin kapjen e drejtësisë pikërisht nga Kryeministri.
“Është një drejtësi me regji. U arrestua Pëllumb Gjoka, si drejtues i një organizate kriminale. Pronat iu sekuestruan 4 muaj më vonë, ndërkohë Jamarbër Malltezi arrestohet dhe brenda 4 orësh i sekuestrojnë pasurinë. Pra Gjokës iu la 4 muaj kohë për të fshehur pronat dhe çfarë ngeli u sekuestrua, ndërsa një njeri si Jamarbër Malltezi, vetëm se është kundërshtar i Edi Ramës, i sekuestrohen pronat, pa asnjë fakt e pa asnjë provë, brenda 4 orësh”, tha Noka.
Ai u shpreh se si të gjithë rilindasit njoftohen që do të arrestohen, më pas bëjnë deklarata. “Kjo ka ndodhur që nga Vangjush Dako, më pas vijoi me të tjerë dhe tani ndodhi me Beqajn. Deklaratat i shkruan e njëjta dorë, Fuga i Edi Ramës, dhe thjesht të akuzuarit e lexojnë”, tha Noka.
Discussion about this post