Prokuroria e Posaçme ka sekuestruar një vilë në Elbasan që dyshohet se i përket vëllezërve Hajdar dhe Franc Çopja. Raportohet se vila dy katëshe dhe me një kat nën tokë është sekuestruar në lagjen “5 Maji”. Sipas përshkimit të SPAK, vila e vëllezërve Çopja ksihte palestër në katin përdhes, lulishte dhe verandë përpara, ndërkohë që ishte e lidhur me një banesë tjetër.
“Më datë 23.02.2025, në zbatim të vendimit nr. 117, datë 15.02.2025, të Gjykatës së Posaçme të Shkallës së Parë për Korrupsionin dhe Krimin e Organizuar është vendosur sekuestro preventive ndaj pasurisë së paluajtshme në adresën; Lagjia ‘5 Maji’, Elbasan, e cila është njësi banimi në pronësi dhe përdorim të familjes së vëllezërve F.G. (alias F. Ç) dhe H.B. (alias H. Ç), këta të fundit persona nën hetim sipas procedimit penal nr.75, viti 2022, si të dyshuar për kryerjen e disa veprave penale kundër jetës dhe pronës, si dhe të pastrimit të produkti të veprës penale dhe veprimtarisë kriminale, në kuadër të organizatës kriminale”, njofton SPAK.
Më tej, prokuroria specifikon edhe të dhënat e objektit të sekuestruar.
“Njësia e banimit, objekt i sekuestrimit ishte një vilë private, me 2 (dy) kate banimi, një tarracë e hapur mbi katin e dytë të banimit, një kat nëntokë, i përshtatur për palestër dhe i pajisur me vegla palestre, një oborr dhe lulishte në pjesën e përparme të godinës së banimit, verandë dhe lulishte në pjesën e pasme të godinës së banimit, si dhe një garazh i hapur nëpërmjet të cilit kalohej në një ndërtesë 1-katëshe, e përshtatur dhe e mobiluar me pajisje zyre. Kati i parë i banimit përbëhej nga një garazh i mbyllur, një dhomë pritjeje, një kuzhinë, si dhe një dhomë gjumi – ambiente plotësisht të mobiluara. Kati i dytë i banimit, përbëhej nga dy dhoma gjumi, secila me garderobë të veçuar dhe këto hapësira plotësisht të mobiluara”, thotë SPAK.
Më herët, SPAK ka njoftuar sekuestrimin e 1 milion euro pasuri të vëllezërve Franc dhe Hajdar Çopja. SPAK me urdhër nga GJKKO sekuestroi llogari bankare, truall, ndërtesa, garazhe, duplekse dhe apartamente. Nga hetimet është zbuluar përdorimi i kriptovalutave nga ana organizatës kriminale, me qëllim realizimin e pagesave të ndryshme. Sipas organit të akuzës është ekzekutuar vendimi i gjykatës dhe janë sekuestruar edhe kriptovaluta me vlerë mbi 10 milionë dollarë.
Më vonë, u sekuestrua edhe Solis Farm, një pikë agroturizmi në Mumajes të Baldushk-ut dhe disa pasuri të tjera.
Sipas hetimeve, dy vëllezërit Florenc dhe Hajdar Çopja ishin kokat e një grupi kriminal në Elbasan, i implikuar në disa vrasje, grabitje dhe krime të tjera.
Lexo edhe:
Dosja Sky ECC/ Franc Çopja nga Dubai i pastronte paratë në Tiranë në projekte ndërtimi
Discussion about this post