Hetimet për atentatin e 1 Nëntorit 2019 ndaj ish-prokurorit të Durrësit Arben Ndoja dhe “Rrumit të Shijakut” zbuluan një tjetër ngjarje kriminale.
Bëhet fjalë për eksplozivin pranë hotel “Victoria’ në Tiranë, më 30 maj 2020.
Hoteli është në pronësi të Luan Matës, babai të akuzuarit si bosi i kokainës Ervin Mata (i njohur si “Boli”), i shpallur në kërkim si anëtar i dyshuar i një grupi kriminal që trafikonte drogë, ku u arrestua dhe ish-zv/drejtori i policisë së Tiranës, Erzen Breçani.
Sipas SPAK, Ramazan Raja akuzohet se ka kryer veprën penale në bashkëpunim me të pandehurit Plaurent Dervishaj dhe Juljan Mecaj.
“Ka rezultuar se i pandehuri Ramazan Rraja, është njëri nga personat që ka kërkuar dhe siguruar një automjet, tek njohjet e tij shoqërore në Durrës, dhe në vijim ka dërguar një nga të afërmit e tij me qëllim për ta marrë këtë automjet, dhe për të realizuar hedhjen e sasisë së lëndës eksplozive, në hotel ‘Victoria’ Tiranë, në pronësi të shtetasit Luan Mata, ngjarje e ndodhur më datë 30.05.2020, ora 22:35. Lidhur me këtë episod i pandehuri Ramazan Rraja akuzohet se e ka kryer veprën penale në bashkëpunim me të pandehurit Plaurent Dervishaj dhe Juljan Mecaj”, njofton SPAK.
Nga shpërthimi i 30 majit nuk pati të lënduar, por u shkaktuar dëme materiale.
“Më datë 30.05.2020, rreth orës 22:40, në një rrugicë të ndërmjetme midis një lokali dhe një hoteli në rrugën e “Dibrës”, ka shpërthyer një sasi e dyshuar si lëndë plasëse. Si pasojë e shpërthimit nuk ka asnjë të lënduar, por vetëm dëme të vogla materiale tek të dy objektet”, njoftoi asokohe policia.
Discussion about this post