Një zhvillim ka ndodhur me projektin e diskutueshëm të ndërtimit turistik në Jalë. Policia e Vlorës ka vënë në pranga inxhinierin zbatues të kompanisë “Jala Investment”, me akuzën e “ndërtimit të paligjshëm” pasi dyshohet se punimet po kryheshin pa leje të vlefshme.
Ky projekt, i miratuar në mars të vitit 2021 nga Këshilli Kombëtar i Rregullimit të Territorit, drejtuar nga kryeministri Edi Rama, ka qenë nën vëzhgimin e publikut që në fillim. Kompania “Jala Investment”, me aksionerët Andi Gjiknuri (përmes “Andi” shpk) dhe Jonian Antoni (“Centuri 21” përmes “AIG” shpk), u akuzua në media se po ndërtonte mbi prona me status të paqartë. Pretendime që u mohuan asokohe nga administratori i kompanisë, Saimor Broka.
Telashet ligjore për “Jala Investment” u thelluan në 3 qershor 2025, kur Policia e Vlorës, pas një inspektimi, arrestoi në flagrancë inxhinierin 40-vjeçar, Klarens C.
Sipas dosjes së Prokurorisë, inxhinieri ka deklaruar se firma kishte një leje të parë ndërtimi, por kishte aplikuar për rishikimin e saj në mars 2024. Punimet kishin vijuar, pavarësisht se përgjigja nga Agjencia për Zhvillimin e Territorit (AZHT) ende nuk kishte ardhur. Policia ka vlerësuar se “vazhdimi i punimeve pa u zbardhur leja e dytë konsiderohet ndërtim i paligjshëm”.
Edhe pse Klarens C. është vetëm inxhinier zbatues dhe punon nën urdhra të administratorit të kompanisë, ai është i vetmi person i penalizuar deri më tani. Kjo ngre dyshime se edhe në këtë rast, ashtu si në raste të tjera të raportuara më parë, përgjegjësia penale po godet hallkën më të ulët të zinxhirit.
Gjykata e Vlorës, në 6 qershor 2025, caktoi për inxhinierin masën e sigurisë “detyrim për paraqitje”, ndërsa Prokuroria po vijon hetimet për zbardhjen e plotë të kësaj ngjarjeje.
Discussion about this post