Hetimi i krimeve zgjedhore, Celibashi: Në ditët në vijim mund të ketë informacione konkrete

Kreu i KQZ, Ilirjan Celibashi ka zhvilluar sot një konferencë me gazetarët në kuadër të zhvillimeve të fushatës elektorale për zgjedhjet e 11 majit.

I pyetur për detaje mbi hetimin e krimeve zgjedhore, Celibashi preferoi t’u qëndronte deklaratave të mëhershme, por theksoi se në ditët në vijim mund të ketë informacione më konkrete dhe të detajuara.

Megjitahtë, ai vuri në dukje se ka një vëmendje të shtuar në lidhje me problematikën e krimeve zgjedhore, gjë që ai e cilësoi si pozitive. “Në ditët në vijim mund të ketë informacione më konkrete dhe të detajuara por ka vëmendje të shtuar në lidhje me këtë problematikë”, tha ai.

Kryekomisioneri i zgjedhjeve u pyet dhe për gjuhën e përdorur nga partitë politike dhe krerët e tyre gjatë fushatës, që herë pas here është cilësuar edhe si “denigruese”.

Celibashi u përgjigj me tone humori, duke thënë se “ata nuk dëgjonë”, duke iu referuar këshillave të mëhershme të KQZ në lidhje me ruajtjen e etikës.

Ai theksoi se KQZ nuk mund të bëjë më shumë se sa ka bërë në lidhje me këtë problematikë, ndërsa shtoi se edhe në shembujt e vendeve perëndimore u takon zgjedhësve që të japin gjykimin e tyre për çdo fushatë.