Një panel i NASA-s, i formuar vitin e kaluar për të studiuar ato që qeveria i quan “fenomene ajrore të paidentifikuara”, të përshkruara zakonisht si UFO, do të mbajë takimin e parë publik sot përpara se të hartojë një raport, publikimi i të cilit pritet në javët e ardhshme.
Ky organ prej 16 anëtarësh , i cili përfshin ekspertë nga fusha që variojnë nga fizika në astrobiologji, u formua qershorin e kaluar për të shqyrtuar pamjet e UFO-ve dhe të dhëna të tjera të mbledhura nga sektorët civilë të qeverisë dhe tregtisë.
Takimi i sotëm publik katër-orësh do të fokusohet “në diskutimet përfundimtare përpara se ekipi i pavarur kërkimor i agjencisë të lëshojë një raport. Ky komision po kryen hetimin e parë të tillë të kryer ndonjëherë nën kujdesin e agjencisë amerikane të hapësirës për një çështje që administrata dikur e kufizonte në kompetencën ekskluzive dhe sekrete të zyrtarëve ushtarakë dhe të sigurisë kombëtare.
Studimi i NASA-s është i ndarë nga një hetim i ri i Pentagonit për fenomenet ajrore të paidentifikuara (UAP), të cilat janë dokumentuar vitet e fundit nga pilotët e avionëve ushtarakë dhe janë analizuar nga zyrtarët e mbrojtjes dhe inteligjencës amerikane.
Përpjekjet paralele të NASA-s dhe Pentagonit – të dyja të kryera me një farë shqyrtimi publik – nënvizojnë një përmbysje të administratës pas dekadave të hedhjes poshtë të raporteve për pamjet e objekteve të paidentifikuara fluturuese (ATIA, UFO) që datojnë në vitet 1940.
Termi UFO, i lidhur prej kohësh me disqet fluturuese dhe alienët, është zëvendësuar në zhargonin e qeverisë me termin UAP (Fenomene Ajrore të Paidentifikuara).
Ndërsa misioni shkencor i NASA -s u pa nga disa si premtues për një qasje më të hapur ndaj një teme të trajtuar prej kohësh si tabu nga strukturat e mbrojtjes, agjencia hapësinore amerikane e bëri të qartë që në fillim se nuk do të nxirrte përfundime të shpejta.
“Nuk ka asnjë provë që UAP-të janë me origjinë jashtëtokësore,” tha NASA në njoftimin e formimit të panelit qershorin e kaluar.
Në deklaratat e saj më të fundit, agjencia prezantoi një ndryshim të mundshëm në vetë akronimin UAP, duke iu referuar atij si një shkurtim për “Fenomene Anomali të Paidentifikuara “. Kjo do të thotë që mund të përfshihen pamje të tjera nga ato që duket se ndodhin në ajër.
Megjithatë, në njoftimin e takimit të sotëm, NASA tha se i përcakton UAP-të “si vëzhgime të ngjarjeve në qiell që nuk mund të identifikohen si avionë ose si fenomene të njohura natyrore nga një këndvështrim shkencor”.
Zyrtarët amerikanë të mbrojtjes kanë thënë se përpjekja e fundit e Pentagonit për të hetuar pamje të tilla ka rezultuar në hetimin e qindra raporteve të reja, megjithëse shumica mbeten të pashpjeguara.
Kreu i Zyrës së re të Pentagonit për Zgjidhjen e Anomalive në Gjithë Domenet (AARO) ka deklaruar se ekzistenca e jetës inteligjente jashtëtokësore nuk është përjashtuar, megjithatë asnjë nga shikimet e objekteve fluturuese të paidentifikuara nuk ka dhënë prova se ato ishin me origjinë jashtëtokësore”, tha NASA në njoftimin e takimit.
Discussion about this post