Hetimi pasuror, Fatos Tushes i sekuestrohet shtëpia në Vlorë

Një apartament është sekuestruar me kërkesë të SPAK në Vlorë, që sipas prokurorisë posedohet “de facto” nga ish-kryebashkiaku socialist i Lushnjes Fatos Tushe.

Nga hetimet e SPAK, rezulton se apartamenti në zonën e Lungomares nuk është deklaruar sipas ligjit nga Tushe gjatë kohës që ushtronte detyrën e kryebashkiakut. Prokuroria thotë se banesa është regjistruar si pronë e një firme ndërtimi, por posedohet nga ish-kryebashkiaku.

Në një njoftim për mediat, Prokuroria e Posaçme bëri me dije këtë të shtunë se për apartamentin me sipërfaqe 75.3 m2, Gjykata e Posaçme ka pranuar kërkesën e saj për vendosjen se sekuestros preventive më 29 Shkurt. Më tej, shpjegohet se vendimi është ekzekutuar më 4 Mars nga policia.

“Nga hetimi paraprak i kryer në kuadër të këtij procedimi penal ka rezultuar se, personi nën hetim Fatos Tushe, gjatë kohës që ka ushtruar detyrën e Kryetarit të Bashkisë Lushnje, nuk ka deklaruar apartamentin në Lungomare Vlorë, pasuri e cila është e regjistruar në emrin e një kompanie që operon në fushën e ndërtimeve, por që posedohet nga personi nën hetim”, njofton SPAK.

Sekuestro vjen në kuadër të procedimit penal nr. 199/1, të vitit 2021 për veprën penale “Refuzimi për deklarimin, mosdeklarimi, fshehja ose deklarimi i rremë i pasurive, interesave privatë të personave të zgjedhur dhe nëpunësve publikë ose i çdo personi tjetër që ka detyrimin ligjor për deklarim”, në ngarkim të Fatos Tushes.

Ky i fundit u paraqit në dyer e SPAK mëngjesin e tre ditëve më parë. Në një prononcim për mediat pas daljes nga prokuroria, konfirmoi se se “paraqitja në SPAK lidhej me mos deklarimin e një pasurie”.

Tushe përfundoi dënimin me burg pak kohë më parë. Në vitin 2022, Fatos Tushe u cilësua fajtor nga Gjykata e Posaçme për shpërdorim detyre në dy raste. Ai u dënua me 3 vite 8 muaj burgim, që për shkak të gjykimit të shkurtuar u konvertuan në 2 vjet e katër muaj. Ish-kryebashkiakut socialist po ashtu iu hoq drejta për të ushtruar funksione publike për 5 vite. Gjykata tha se Tushe shpërdoroi detyrën për shkak se lejoi një ndërtim pa leje, ndërsa abuzoi me karburantin e bashkisë.

Gjykata dënoi po ashtu ish-nënkryetarin Gentian Nushi si dhe 17 persona të tjerë, zyrtarë të bashkisë e biznesmenë, të përfshirë në abuzimet me një tender për kanalet vaditëse.

Pas arrestimit me urdhër të SPAK në korrik 2021, Tushe u shkarkua nga detyra me vendim qeverie.