Hidhet në erë me tritol bankomati i parave në Krujë

Persona të paidentifikuar kanë hedhur në erë me tritol në hyrje të kalasë së Krujës, bankomatin e një banke private.

Nuk dihet nëse është bërë e mundur marrja e parave që gjendej në këtë bankomat apo jo, por kjo gjë po verifikohet.

Ngjarja ka ndodhur rreth orës 02:00 të mëngjesit të sotëm nga persona të cilët pasi kanë hedhur në erë ‘makinën e parave’ janë larguar me motor në rrugën dytësore të kalasë.

Në ikje, autorët e shpërthimit të bankomatit kanë lëshuar nëpër rrugë dhe kunja hekuri, që shpojnë gomat e makinave.

Kjo gjë duket se ka ndodhur për të shmangur ndonjë ndjekje nga policia.

Këta të fundit kanë nisur hetimet për ngjarjen, duke mbledhur edhe pamje filmike, për të zbuluar autorët dhe zbardhur këtë krim.

Njoftimi i policisë:

Më datë 12.11.2024, rreth orës 02:45, pranë një bankomati në afërsi të Kalasë (në rrugë), është dëgjuar një shpërthim, i ngjashëm me lëndët plasëse ose lëndët piroteknike dhe si pasojë ka vetëm dëme materiale.

Grupi hetimor po punon për sqarimin e rrethanave të ngjarjes.