Hidhet në erë me tritol makina e kreut të PD në Vaun e Dejës

Një ngjarje e rëndë ka ndodhur mbrëmë në Vaun e Dejës.

Mësohet se i është vendosur tritol kryetarit të PD-së në këtë qytezë, Bernard Ndreca. Tritoli ishte vendosur në pjesën e përparme të automjetit të Ndrecës.

Ngjarja është shënuar pak para mesnatës në afërsi të banesës së tij.

Nuk raportohet për persona të lënduar dhe dëmet materiale janë të pakta.

Ndërsa hetimet për zbardhjen e ngjarjes vijojnë, ngjarja në fjalë vjen vetëm pak orë pasi lista e kandidatëve për Këshillin Bashkiak të PD-së së drejtuar nga Enkelejd Alibeaj në Vaun e Dejës doli në mbështetje të Zef Hilës në zgjedhjet e 14 Majit.

Lajmin e bëri dje të ditur vetë PD dega e Vaut të Dejës, me anë të një komunikate zyrtare për shtyp.

Në këtë komunikatë shkruhet se ata shprehnin hapur mbështetjen për kandidatin e koalicionit “Bashkë Fitojmë”, Zef Hila.