Hidhet shorti/ Elteva Deda, gjyqtarja që do të gjykojë Jorgo Goron

Elteva Deda është gjyqtarja që do të gjykojë ish-kryebashkiakun e Himarës Jorgo Goro. Shorti elektronik u hodh pasi dosja kaloi për gjykim.

Goro akuzohet për shpërdorim detyre në bashkëpunim dhe fshehje e pasurisë.

Ish-kryebashkiaku i Himarës, Jorgo Goro, u arrestua për shpërdorim detyre, kryer në bashkëpunim në lidhje me tjetërsimin e një sipërfaqeje toke, që gjendet në fshatin Gjilekë të Dhërmiut, të cilën Gjykata e Posaçme e ka nën sekuestro. Këto sipërfaqe prej rreth 10 mijë metra katror janë sekuestruar nga SPAK dhe si përfitues fundor kishin ish-deputetin Artan Gaçi.

Goro u arrestua në muajin mars të  2024, pas kallëzimit te depozituar nga Fredi Beleri, i cili la qelinë pak muaj më parë. Për të njëjtën çështje, do të gjykohet edhe ish-kreu i Kadastrës së Vlorës, Bilbil Aliaj, i cili ndodhet në masën e sigurisë ‘detyrim paraqitje’ si dhe ish-juristi Vezir Gjikoka që ka masën ‘arrest në shtëpi’.