Bisedat në telefonin e Fredi Kokaveshit, që është zbërthyer nga SPAK, duket se përbëjnë provat kryesore që Prokuroria ka ndaj Fredi Belerit, kryetarit të zgjedhur të Bashkisë së Himarës, i arrestuar më 12 maj, dy ditë para zgjedhjeve, me akuzën e korrupsionit zgjedhor.
Provat u paraqitën në seancën e GJKKO nga prokurorët e SPAK, por u kundërshtuan nga avokatët e Belerit.
SPAK pretendon se në telefonin e Kokaveshit, i arrestuar bashkë me Belerin, por që më pas u lirua për shkak të problemeve shëndetësore që shfaqi, ekziston një grup në aplikacionin “WhatsApp” i emëruar “Himara ime je ti”, ku Kokaveshi premtonte dokumente greke për banorët e Himarës.
Madje në një moment Beleri i ka shkruar Kokaveshit duke e paralajmëruar. “Çfarë janë këto biseda, nga këto do të digjesh ti”, i ka shkruar Beleri-Kokaveshit.
SPAK thotë se dokumentet greke ofroheshin për qytetarët e Bashkisë Himarë në këmbim të votës për Fredi Belerin.
Sakaq, telefoni i Belerit nuk është arritur të hapet, pasi nuk ka pranuar të dorëzojë kodin. Por hetuesit e SPAK kanë ekspertuar telefonin e dëshmitarit Arsen Rama, ku kanë zbuluar se ai ka patur komunikime nga numri i Belerit.
Discussion about this post