Belind Këlliçi, anëtar i Kryesisë së PD-së, e konsideroi si normalitet fals atë që kryebashkiaku i Tiranës Erion Veliaj po përpiqej të shesë në opinionin publik, një ditë pasi me urdhër të SPAK u arrestuan drejtorë të Bashkisë që drejton ,në kuadër të hetimeve të asaj që njihet si dosja “5D”.
Veliaj u shfaq sot në një takim të PS-së Tiranë duke folur për anëtarësimet e reja në parti, në një kohë kur i gjithë shtabi elektoral në zgjedhjet e 14 majit ose ndodhet në burg, ose ka masa sigurie më të lehta nga SPAK.
“Jam i gëzuar jo vetëm për anëtarësimet e reja dhe cilësinë e tyre, por edhe për faktin se sfida ka qenë e vështirë dhe kryetarët tanë, sidomos koleget vajza, arritën ta mbyllin sukses këtë detyrë, madje duke tejkaluar pritshmëritë”, tha Veliaj në reagimin e parë publik, nga moment kur 3 nga drejtorët më të rëndësishëm të tij ndodhen në qeli.
I pyetur në një intervistë televizive mbi këtë formë të reagimit nga kryebashkiaku, Këlliçi tha se në Bashkinë e Tiranës të gjitha drejtoritë janë të paralizuara, pasi askush nuk pranon që të bëjë burgun për Erion Veliajn.
“Askush nuk rrezikon të marrë kostot, apo të humbasin lirinë, për shkak të përfitimeve të titullarëve dhe kreut të bashkisë që quhet Erion Veliaj. Më bëri përshtypje që Veliaj po tenton të shesë normalitet fals”, tha Këlliçi.
Discussion about this post