Hipokrizia/ Rama kujtohet për “21 Janarin” vetëm një herë në vit, kërkon drejtësi pas 12 vitesh në pushtet

Ditën e sotme bëhen 14 vite nga demonstrata e 21 Janarit të vitit 2011, kur në bulevardin “Dëshmorët e Kombit” u vranë Aleks Nika, Hekuran Deda, Ziver Veizi dhe Faik Myrtaj, të cilët kishin dalë në tubimin e thirrur nga Edi Rama para Kryeministrisë.

Për këtë ngjarje të rëndë, Gjykata ka vlerësuar se vrasjet e Ziver Veizit dhe Faik Myrtajt kanë ndodhur nga pakujdesia dhe ka dënuar ish-komandantin e Gardës, Ndrea Prendi me një vit burg, si dhe gardistin Agim Llupo me 3 vite.

Ndërsa, vrasjet e Aleks Nikës dhe Hekuran Dedës dhe plagosja me armë zjarri e 6 personave të tjerë gjatë demonstratës ka mbetur pa autorë dhe prokuroria e pati pezulluar atë për vite me rradhë në kërkim të provave.

Hetimi u rihap nga SPAK, i cili ka regjistruar procedimin penal më 15 Korrik të vitit të kaluar për veprat penale: “Vrasja në rrethana të tjera cilësuese”, e kryer në bashkëpunim, kundër dy ose më shumë personave dhe në mënyrë të rrezikshme për jetën e shumë personave; “Shpërdorim i detyrës”, e kryer në bashkëpunim dhe “Kryerja e veprimeve që pengojnë zbulimin e së vërtetës”, e kryer në bashkëpunim.

Procedimi penal u regjistrua në zbatim të vendimit të Kolegjit të Gjykatës së Lartë të dhënë më 12 Mars të vitit të kaluar, e cila vendosi që çështja të hetohet nga Prokuroria e Posaçme pas kallëzimit të Rajmona Nikës, e veja e Aleks Nikës.

Për këtë ngjarje kaq të rëndë me 4 viktima vazhdon çdo vit dhe hipokrizia nga ana e Edi Ramës. Ky i fundit kujtohet për Aleks Nikën, Hekuran Dedën, Ziver Veizin dhe Faik Myrtajn vetëm një herë në vit, më 21 Janar, e teksa po bën 12 vite me pushtet absolut, vazhdon ende të kërkojë drejtësi.

Të njëjtën gjë ka bërë edhe ditën e sotme, ku në një postim në rrjetet sociale shkruan: “21 Janar “Drejtësia vonon po nuk harron”, thotë populli dhe sot kush po e vonon drejtësinë për 21 janarin, nuk duhet të harrojë se fëmijët e dëshmorëve po bëhen prindër duke pritur drejtësinë…”.

Ndërkohë, vlen të theksohet fakti se pllakat prej bronzi të vendosura në bulevard në kujtim të Hekuran Dedës dhe Faik Myrtajt ishin vjedhur prej kohësh dhe Qeveria e Edi Ramës u kujtua për t’i zëvendësuar vetëm kur u afrua 21 Janari që kryeministri të dal bukur në foto kur të hedhë trëndafilat e kuq sipër tyre.

Jo vetëm kaq, por Rama shpërbleu edhe një prej gardistëve të “21 Janarit”, Agron Malajn duke e caktuar kryetar Bashkie në Mat.