Qeveria shqiptare pas mbledhjes së ditës së sotme ka miratuar vendimin për nënshkrimin e marrëveshjes me qeverinë serbe për heqjen e kontrolleve doganore të bizneseve serbe që do të kalojnë kufirin drejt Shqipërisë.
“V e n d i m për miratimin, në parim, të marrëveshjes, ndërmjet KËSHILLIT TË MINISTRAVE TË REPUBLIKËS SË SHQIPËRISË DHE QEVERISË SË REPUBLIKËS SË SERBISË, për njohjen reciproke të operatorëve ekonomikë të autorizuar-autorizimet për sigurinë dhe mbrojtjen (OEAS)”, shkruhet në vendimin e zbardhur.
Gjithashtu e njëjta marrëveshje është miratuar edhe për heqjen e kontrolleve doganore për bizneset e Maqedonisë së Veriut që duan të kalojnë kufirin drejt Shqipërisë.
Operatori Ekonomik i Autorizuar (OEA) është një status i lëshuar për “tregtarët me besueshmëri” të cilët mund të përfitojnë nga shumë thjeshtime doganore. Sipas Kodit Doganor Shqiptar, janë dy lloje statusi për OEA që mund të lëshohen :
“OEA-D për thjeshtime doganore: nënkupton një operator ekonomik të autorizuar për thjeshtësime doganore
“OEA-S për sigurinë dhe mbrojtjen- nënkupton një operator ekonomik të autorizuar për lehtësira në kontrolle doganore
Nëse një OEA kërkon të përfitojë një thjeshtim/regjim, dogana nuk shqyrton kushtet apo kriteret.
Këto dy vendime vijnë pas takimeve mes liderëve të tre vendeve dhe në kuadër të nismës “Open Balkan”, ku heqja e kontrolleve doganore ishte një ndër pikat më të diskutuara. Kujtojmë se pjesë e kësaj nisme nuk ka pranuar që të jetë shteti i Kosovës, kjo për shkak të tensioneve me Serbinë.
Discussion about this post