Zëvendës Ministri i Jashtëm i Azerbajxhanit, Fariz Rzayev dhe Zëvendësministri për Evropën dhe Punët e Jashtme i Shqipërisë, Besart Kadia kanë nënshkruar marrëveshjen për heqjen e vizave mes dy shteteve.
Lajmi bëhet i ditur nga Ambasadori i Azerbajxhanit në Shqipëri, Anar Huseynov.
Përmes një postimi në rrjete sociale, Huseynov shkruan se nënshkrimi i marrëveshjes për përjashtimin e vizave, është një tjetër kontribut i fuqishëm në marrëdhëniet dypalëshe.
“Fariz Rzayev, Zëvendës Ministër i Jashtëm i Azerbajxhanit, dhe Zëvendësministri për Evropën dhe Punët e Jashtme i Shqipërisë, Besart Kadia, folën për thellimin e marrëdhënieve dypalëshe mes vendeve tona, me fokus ndërveprimin ekonomik dhe kontaktet mes njerëzve. Takimi pasoi me nënshkrimin e marrëveshjes për përjashtimin e vizave, një tjetër kontribut i fuqishëm në marrëdhëniet dypalëshe”, shkruan ambasadori Anar Huseynov.
Kujtojmë se ditën e sotme kryeministri Edi Rama ndodhet në Baku të Azerbajxhanit, si i ftuar nderi i Presidentit Ilham Alijev, në Samitin e 10-të të Korridorit Jugor të Gazit.
Discussion about this post