Gjyshja dhe babai janë të vetmit që i kanë mbetur pranë dhe kujdesen për Neldjonin, në mungesën e të ëmës, e cila ndodhet ende pas hekurave të burgut. Të qarat e vogëlushit janë më të shpeshta pasi duket se e ndjen mungesën e ngrohtësisë dhe përkujdesjes së nënës, ose të paktën kështu thotë babai i tij. Gazetari i Balkanweb ka shkuar në banesën e tyre, ku bien në sy kushtet e vështira ekonomike të familjes.
Por Naimi thotë që e vetmja gjë që do është kthimi i gruas së tij pranë djalit të vogël që çdo ditë e më shumë ka nevojë për të.
“Kemi vuajtje shumë, kujdesem por nuk ia di të merrem me të. Që kur iku gruaja më duket se ka rënë, se edhe ai e ndjen që nuk e ka pranë të ëmën,”-thotë ai për kamerat. Nga ana tjetër, mosha ia bën të vështirë gjyshe Zyfes të kujdeset për nipin e saj, megjithatë ajo përpiqet pafund që të voglit të mos i mungoje asgjë. Por sërish nuk mund ta luajë rolin e të ëmës, Djanës.
“Unë kujdesem sa më shumë se është djali i djalit. Por vështirë boll është. Qan natën, unë kërkoj vetëm të ëmën, të ma sjellin sa më parë.”
Rasti i Diana Bahçjas ka marrë vëmendjen e publikut për shkak të paradoksit nga drejtësia shqiptare. Diana Bahçja ishte dënuar nga gjykata me gjobë, pasi pas ndarjes nga burri i parë, martesë nga e cila kishte një vajzë, nuk i ishte përgjigjur detyrimit që kishte për fëmijën. Ky pretendim mohohet nga Diana që deklaron se ish-burri e dhunonte. Por çudia ka ndodhur me vendimin e gjykatës. 3 vite pasi Diana Bahçja mori gjobën, Gjykata e Shkallës së Parë Tiranë, vendosi ta konvertonte dënimin nga gjobë në 50 ditë burg, pa marrë parasysh faktin se ajo është nënë e një fëmije të porsalindur.
Pa asnjë dijeni ajo u arrestua dhe ndodhet në burg, edhe pse ligji bën një tjetër parashtrim për rastin e saj. Diana Bahçja përfiton nga ligji dhe Kodi Penal, që parashikon shumë qartë se në rastin kur nëna është shtatzënë ose ka fëmijën nën 1 vjeç, atëherë ekzekutimi i vendimit për dënim edhe në rast se është i drejtë, do të duhet të shtyhet derisa bebi të mbushë 1 vjeç. Kjo në rastin e saj nuk ka ndodhur. Nëna është në burg ndërsa për fëmijën që ka nevojë urgjente dhe të pajustifikuar për nënë, është duke u kujdesur i shoqi, Naim Bahçja bashkë me mbesën e tij 11-vjeçare.
Discussion about this post