Nënkryetarja e Kuvendit, Ermonela Felaj, u përpoq pa sukses të ruante krenarinë personale, përballë furisë së deputetëve opozitarë, të cilët e akuzonin në seancën plenare të kësaj të Hëne se kishte ndikuar politikisht për emërimin e katër familjarëve të saj shumë të afërt në Prokurorinë e Tiranës, tre prokurorë dhe një oficer i Policisë Gjyqësore.
Felaj deklaroi se ata i kishin marrë pozicionet me meritë dhe se nuk kishte asnjë shkelje ligjore apo ndikim jashtë-institucional në vendimet e Këshillit të Lartë të Prokurorisë në favor të bashkëshortit, motrës, vëllai dhe nuses së vëllait në institucionin e Akuzës së kryeqytetit. Megjithatë, të dhënat e përmbledhura nga “Gijotina.com” tregojnë se, jo vetëm që ka pasur ndikim politik, por se shndërrimin i prokurorisë së Tiranës në domeinin e familjes Felaj është një dëshmi e shkërmoqjes së “Drejtësisë së Re”.
Një shkërmoqje, e cila po ndodh në sytë e kumbarëve ndërkombëtarë të Reformës në Drejtësi dhe që po realizohet me një arrogancë aspak dinjitoze për një vend që aspiron Bashkimin Europian. Në ngritjen e “Prokurorisë Felaj” kanë ndihmuar një seri institucionesh: Parlamenti, Gjykata, Këshilli i Lartë i Prokurorisë e Prokuroria e Përgjithshme. Të gjithë krerët dhe anëtarët e këtyre institucioneve të larta kushtetuese kanë vendosur nga një tullë të rëndë, për të krijuar kështjellën familjare të deputetes socialiste.
Prokurori i parë, bashkëshorti i Ermonelës
Bledar Valikaj, bashkëshorti i Ermonela Felaj, ka punuar për shumë vitesh si oficer i Policisë Gjyqësore, kryesisht në Berat. Në vitin 2015, ai fiton konkursin e zhvilluar nga Prokuroria e Përgjithshme për t’u emëruar prokuror.
Ligji i asaj kohe parashikonte që prokurorët duhet të dekretoheshin nga Presidenti i Republikës. Kreu i shtetit në atë kohë ishte i ndjeri Bujar Nishani. Ai nuk pranoi të dekretonte Valikajn si prokuror brenda 30 ditëve, siç parashikonte Kushtetua, duke e refuzuar me heshtje emërimin e tij si prokuror.
Diçitura: Çifti i bashkëshortëve Ermonela Felaj-Bledar Valikaj
Valikaj ankimon vendimin në Gjykatën e Apelit Administrativ. Shorti cakton si gjyqtar të çështjes Kastriot Selitën, i cili mbante edhe detyrën e kreut të asaj gjykate. Ndërkohë që padia e Valikajt pritej të shqyrtohej, hyri në fuqi paketa e Reformës në Drejtësi, e cila parashikonte që prokuror mund të emëroheshin vetëm ata që kishin mbaruar Shkollën e Magjistraturës dhe që kishin kaluar me sukses paraprakisht Vetingun.
Gjyqtari Selita, me një lëvizje aspak normale, vendosi të pranojë padinë e bashkëshortit të Ermonela Felaj, duke detyruar Këshillin e Lartë të Prokurorisë që të kryente emërimin e Valikaj si prokuror. Këshilli i Lartë i Prokurorisë, i drejtuar në atë kohë nga Gent Ibrahimi, një i afërm i deputetes tjetër socialiste, Mimi Kodheli, vendosi të emërojë Bledar Valikaj në postin e prokurorit në Vlorë, pa kryer Shkollën e Magjistraturës dhe pa u përfshirë në procesin e Vetingut.
Valikaj nuk kreu asnjë ditë punë në prokurorinë e Vlorës, pasi ai u transferua menjëherë në Prokurorinë e Tiranës. Ndërkohë, vendimi i gjyqtarit Kastriot Selita për Valikajn u bë objekt diskutimesh gjatë procesit të rivlerësimit të këtij të fundit. Operacioni Ndërkombëtar i Monitorimit dhe Komisioneri Publik kërkuan shkarkimin e Selitës për disa arsye, përfshirë edhe atë që e konsideruan si shkelje të rëndë në emërimin e Bledar Valikajt si prokuror.
Diçitura: Gjyqtari Kastriot Selita u shkarkua pasi emëroi Bledaj Valikaj si prokuror
Aktualisht, Valikaj vijon detyrën si prokuror në Tiranë, ndërsa gjyqtari Kastriot Selita u shkarkua nga detyra për shkelje të rënda, bazuar në vendimin e Kolegjit të Posaçëm të Apelimit.
Vëllai i Ermonelës
Në qershor të vitit 2019, Prokurorja e Përgjithme e Përkohshme, Arta Marku, zhvilloi një konkurs për emërimin e një trupe oficerësh të Policisë Gjyqësore.
Në median e asaj kohe, lista e fituesve u konsiderua si “listë qokash” që Arta Marku u bëri politikanëve të ndryshëm apo edhe miqve të saj, avokatë e inspektorë Tatimesh nga Shkodra. Në listën e fituesve gjendej edhe emri i Armando Felaj, vëllai i deputetes Ermonela Felaj.
Diçitura: Armando Felaj u emërua Oficer i Policisë Gjyqësore në një “listë qokash” të Arta Markut
Ligjvënësia socialiste ishte një prej mbështetëseve më të mëdha të Arta Markut, një juriste mediokre që fati i bëri suprizë për të qenë në krye të organit të Akuzës. Marku, me shumë mundësi e dinte se nuk e meritonte pozicionin që iu dhurua dhe tentoi me “qoka” për të mbajtur detyrën e lartë. Megjithatë, pavarësisht ndereve dhe varësisë që krijoi ndaj Partisë Socialiste, Arta Marku u largua nga drejtimi i Prokurorisë në fund të vitit 2019.
Kunata e deputetes
Në fund të majit 2023, Këshilli i Lartë i Prokurorisë vendosi transferimin e prokurores Alma Felaj nga Durrësi në Tiranë. Magjistratja është kunata e Ermonela Felaj, nusja e vëllait, Armandit, i cili ishte emëruar më herët Oficer i Policisë Gjyqësore pranë Akuzës së kryeqytetit.
Në një situatë normale, emërimi i saj në institucionin ku punon bashkëshorti si OPGJ dhe kunati i saj (Bledar Valikaj) si prokuror, nuk do të ishte kryer. Por, masat ishin marrë më herët. Me një ndërhyrje kirurgjikale në ligjin “për statusin e gjyqtarëve dhe prokurorëve”, ishte krijuar hapësira që familjarët Felaj të punonin në të njëjtin institicion.
Çfarë kishte ndodhur? Në vitin 2016, Parlamenti miratoi ligjin “Për statusin e gjyqtarëve dhe prokurorëve”, si pjesë e paketës së Reformës në Drejtësi. Në bazë të këtij ligji, ndalohej që të punonin në të njëjtën gjykatë apo prokurori magjistratë (prokurorë dhe gjyqtarë) që kishin lidhje familjare ose krushqi e afërt me njëri-tjetrin.
Në vitin 2019, një grup deputetësh socialistë, mes të cilëve edhe Ermonela Felaj, propozuan ndryshimin e këtij ligji. Në bazë të ndryshimit ligjor, hiqej ndalimi që në një prokurori të punonin persona në lidhje krushqie me njëri-tjetrin. Në këtë mënyrë, nuk kishte asnjë ndalim që dy prokurorët kunetër-Bledar Valikaj dhe Alma Felaj-të punonin si magjistratë në të njëjtën prokurori. Bazuar në këtë ndryshim ligjor, Këshilli i Lartë i Prokurorisë vendosi që të transferonte prokuroren Alma Felaj, në Prokurorinë e Tiranës.
Diçitura: Vendimi për transferimin e kunatës së Ermonela Felaj nga Durrësi në Tiranë
Pra, u bënë tre persona që kishin lidhje të ngushta me deputeten Ermonela Felaj (bashkëshorti Bledaj Valikaj, vëllai Armand Felaj dhe nusja e vëllait, Alma Felaj, të gjithë në Prokurorinë e kryeqytetit.
Por nuk përfundoi këtu.
Motra Felajt
Në sistem kishte mbetur edhe një prokuror tjetër Felaj-motra e deputetes, Eranda Felaj- e cila ushtronte detyrën e magjistratit në Vlorë.
Tashmë, rruga ishte hapur. Motra e saj deputete ishte kujdesur që të shmangte nga rruga çdo ferrë ligjore dhe të krijonte të gjitha kushtet që motra e saj të siguronte emërimin në Tiranë.
Kryetari i Këshillit të Lartë të Prokurorisë, Alfred Balla, deklaroi para deputetëve se “ishte koincidencë” që pjesëtarë të një familjeje ishin emëruar në prokurorinë e Tiranës dhe se “KLP nuk kishte evidenca për të kuptuar nësë magjistratët janë familjarë me njëri-tjetrin”.
Prej javësh, opinioni publik po zien nga diskutimet se si familjarët e deputetes Ermonela Felaj po “pushtojnë” Prokurorinë e Tiranës. Vetëm kreu i KLP-së, institucionit përgjegjës për karrierën, emërimin dhe transferimin e prokurorëve nuk kishte dijeni të plotë se po emëronte 4 “Felaj” në Akuzën e kryeqytetit.
Diçitura: Vendimi i KLP-së për transferimin e motrës së deputetes Ermonela Felaj nga prokuroria e Vlorës në prokurorinë e Tiranës
Ndërkohë që Alfred Balla jepte këtë përgjigje pa përgjigje, kolegët e tij në Këshillin e Lartë të Prokurorisë formalizuan me vendim transferimin e Eranda Felaj nga prokuroria e Vlorës në atë të Tiranës. Kjo histori “familjare” përbën shembullin më ulëritës se si Reforma në Drejtësi u shndërrua në një godinë për plotësim qokash për politikanë e njerëz me pushtet.
Lexo: Krijoi ‘dinastinë Felaj’ në prokurorinë e Tiranës, Ermonela: Jam krenare…
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post