Portugezi Ruben Saraiva që akuzohet se vrau biznesmenin Ardian Nikulaj, kishte sajuar një histori në mënyrë që banorët e zonës të mos dyshonin tek ai.
Teksa fliste në një emision televiziv për të njëjtën ngjarje, është bërë me dije se portugezi thoshte se në Shqipëri e kishte sjellë dashuria. Sipas gazetarit, Saraiva tregonte se kishte dëshirë të martohej me një vajzë shqiptare, por që familja e saj nuk pranonte, ndaj kishte ardhur që t’i bindtte.
“4 britanik dhe 1 portugez, që përfshihen në një vrasje në Shqipëri. Që rrinë dy muaj këtu, vijnë vërdallë. Madje sipas të dhënave që mora unë para emisionit, portugezi kishte hapur edhe një legjendë në zonën ku jetonte. Sikur donte një vajzë shqiptare dhe nuk ia jepte familja, edhe kishte ardhur për një histori dashurie. Në këtë mënyrë e dinte edhe ai që kemi disa probleme paragykimiesh. Kështu që kishte krijuar një histori të tërën për alibi,”- tha Fevziu.
Vrasja e Nikulajt u zbardh një ditë më parë. Policia doli me një deklaratë zyrtare ku njoftoi se gjithçka ishte planifikuar nga vëllezërit Lestakaj, me të cilët Nikulaj ishte në hasmëri që prej vitit 1997. Dyshohet se hasmit kishin paguar një skuadër të huajsh për të ardhur për të kryer vrasjen.
Sipas të dhënave të policisë, në rolin e ekzekutorit ishte portugezi Ruben Saraiva, ndërsa katër britanikë ishin vëzhgues. Ata janë identifikuar si: Harry Simson, Thomas Mithan, Steven Hunt dhe Harriet Bridgeman.
I gjithë ekipi menaxhohej nga Edmond Haxhia, djali i dajës i vëllezërve Lestakaj. Por, deri më tani asnjë prej të përfshirëve nuk janë arrestuar. Të gjithë janë larguar nga Shqipëria dhe nuk dihet destinacioni i tyre. Nga ana tjetër, vetë vëllezërit Lestakaj ndodhen në Britaninë e Madhe.
Discussion about this post