Burri që u shfaq në foto quhet Mesut Hançer dhe fatkeqësisht ka treguar se e bija, Irmak, 15 vjeç nuk arriti t’i mbijetojë tërmetit që goditi Turqinë dhe Sirinë.
Mesut tregoi makthin e përjetuar duke u shprehur se ka gërmuar me duart e tij për të shpëtuar të bijën 15-vjeçare, por ajo nuk arriti të mbijetonte. Por edhe pse e bija kishte ndërruar jetë, Mesut refuzonte t’ia lëshonte dorën dhe të shkëputej prej saj.
Intervista
Në intervistën e dhënë mbi varrin e së bijës, ai tregoi se ishte duke punuar në furrë buke kur ndodhi tërmeti.
Ai tha se gruaja dhe fëmijët e tjerë ishin të sigurt dhe shëndoshë e mirë, ndërsa 15-vjeçarja kishte shkuar te shtëpia e gjyshes, pasi kishin ardhur të afërm dhe ajo donte të ishte me ta.
“Po punoja në furrë buke kur u drodh toka. Telefonova gruan dhe ajo më tha se dy vajzat dhe djali ishin të sigurt, ndërsa vajza e vogël nuk fjeti në shtëpi atë natë, por në divanin e shtëpisë së gjyshes”, rrëfeu 49-vjeçari.
Telefonata
“E mora në telefon dhe nuk përgjigjej”, shtoi ai dhe tregoi se shkoi menjëherë drejt rrënojave, ku iu lut Zotit që familja dhe shtëpia e tij të ishte e plotë dhe të mos kishte të lënduar.
Irmak ndërroi jetë të hënën, pasi një bllok masiv ra sipër saj. Sipas zërave, 15-vjeçarja qëndroi për disa ditë nën rrënoja dhe më pas, autoritetet arritën të nxirrnin trupin e saj, për ta dorëzuar te familja.
Momenti prekes
Mbi momentin prekës ka folur edhe fotografi i “AFP”, Adem Altan, i cili shkrepi foton dhe më pas, ajo bëri xhiron e rrjetit. “Ndërkohë që bëja foton, ishte kaq e trishtueshme. Vazhdoja t’i përsërisja vetes: “Çfarë dhimbjeje e papërballueshme”. Nuk ndaloja dot së qari”, tha fotografi.
“Isha pa fjalë”, vijoi ai dhe më pas tregoi se e pyeti të atin për emrin e tij dhe atë të vajzës së ndjerë.
Përmes kësaj fotoje, u transmetua e gjithë dhimbja e tërmetit fatal dhe e njerëzve që po vuajnë pasojat e tij.
Discussion about this post