Një nga historitë më të mira të kualifikimeve të Kampionatit Evropian të përfunduar së fundmi është kombëtarja e Shqipërisë, e cila u kualifikua për herë të dytë në historinë e saj.
Shqiptarët fituan vendin e parë në grup përpara Çekisë, Polonisë, Moldavisë dhe Ishujve Faroe dhe pjesë e skuadrës së Sylvinho është ish-lojtari i Lokomotivës, Myrto Uzuni. Kështu e ka filluar shkrimin mediumi kroat, “Index.hr”.
Sot ai është futbollist i Granadës, së cilës iu bashkua janarin e kaluar nga Ferencvaros për katër milionë euro. Lokomotiva e shiti atë te skuadra hunagreze në verën e vitit 2020 për 1.8 milion euro. Ai luajti 69 ndeshje për klubin kroat dhe shënoi 20 gola dhe 16 asistime.
Në një intervistë për portalin spanjoll Panenka, Uzuni zbuloi detaje tronditëse nga fëmijëria e tij në të cilën ishte emigrant ilegal në Greqi dhe për shkak të varfërisë së madhe të familjes së tij, iu desh të ndalonte së luajturi futboll në një fazë të jetës së tij edhe pse gjithmonë e ka dashur shumë.
“Kur isha fëmijë, unë dhe familja ime paguanim 20 mijë euro për të kaluar kufirin për në Greqi, sepse Shqipëria nuk është në Bashkimin Evropian. Hymë nga pylli. Futbolli ishte ëndrra ime, por më pas ndalova edhe stërvitjen”, ka rrëfyer Uzuni.
“Shumë net kam qarë në dhomën time, në banjë, pa më parë njeri. Nuk doja që prindërit e mi të ndiheshin keq. E gjithë kjo më dha forcë për të qenë lojtari që jam sot. Asnjëherë nuk kam menduar të heq dorë”.
“Kam punuar ilegalisht, kam qenë kamerier, kam larë enët, kam mbledhur ullinj, kam pastruar shtëpitë”, shtoi Uzuni. Në një turne ai ra në sy nga Olimpiakos, i cili donte ta transferonte, por nuk mundi pasi Uzuni ndodhej në Greqi ilegalisht.
“Shpejt u kthyem në Shqipëri edhe pse nuk kishim as shtëpi. Fillova të luaja për klubin e parë, Tomori i cili më paguante 165 euro në muaj. Të gjitha paratë ua dhashë prindërve të mi, të cilët ishin shumë të lumtur për mua”, vazhdoi rrëfimin e tij Uzuni, i cili më pas shkoi te Apolonia, më pas te Laka dhe më pas te Lokomotiva.
Një muaj pasi mbërriti në Lokomotiva për 350 mijë euro në shtator të 2018-ës, ai mori një thirrje në kombëtaren shqiptare, për të cilën luajti 35 ndeshje dhe shënoi pesë gola dhe tani është kualifikuar edhe në Euro 2024.
Discussion about this post