Gjykata e Beratit ka dhënë sot masat e arrestit për tre të ndaluarit, pasi hodhën në treg 21 ton mandarina të ndaluara për treg, të kthyer nga Kroacia.
Arben Dyli, grumbulluesi, është lënë me burg.
Elton Tafaj, fermeri, është lënë në burg.
Elson Tahiraj, inspektori i shtetit, është lënë në burg.
Ndaj tyre rëndojnë akuzat për “Shpërdorim detyre,” “Shkelje të rregullave për lëndët helmuese,” “Prodhim dhe shitje të ushqimeve të rrezikshme për jetën e njerëzve” dhe “Mashtrim me produktet ushqimore”. Bëhet fjalë për mbi 21.000 kg mandarina, që pas kthimit nga Kroacia, nuk janë asgjesuar në mënyrën e duhur.
Sipas pretendimeve të fermerit, mandarina ishin hedhur në landfillin e Bashkisë Dimal, por gjatë inspektimit nuk u gjetën mbetje të produktit. Kjo sasi mandarinash, me përmbajtje të lartë pesticidesh është shitur në qarqet Berat dhe Sarandë.
Gjatë seancës avokatët mbrojtës i quajtën të ndaluarit viktima të luftës tregtare të konkurrencës me qëllim dëmtimin e tregtarëve vendas. Madje avokati mbrojtës i Arben Dylit hodhi dyshime në vërtetësinë e analizave të shtetit kroat.
Në fjalën e tij përpara trupit gjykues, eksportuesi Arben Dyli u shpreh se nuk e dinte që duhej njoftuar AKU pasi iu kthye produkti mandarinës.
Ai njoftoi fermerët një nga Goriçani dhe tjetri nga Saranda për të marrë mbrapsht mallin.
Fermeri i arrestuar Elton Tafa u shpreh se i është bërë padrejtësi nga AKU pasi i ka treguar që mandarinat ishin prishur, kalbur, ndaj i hodhi në landfillin e Dimalit.
“Mu thye zemra kur i hodha sepse ishte djersa ime”, ka thënë ai. Tafa kishte debatuar me Dylin pasi dyshonte që mandarinat e kthyera mbrapsht nuk ishin të tijat, e megjithatë ai e mori të mirëqenë dhe i hodhi në plehra.
Pavarësisht mbrojtjes dhe deklarimeve të të arrestuarve, gjykata vendosi masën e arrestit me burg.
Gjyqtari i çështjes ishte Ilirjan Hysa, ndërsa prokurorja Malvina Pellumbi.
Discussion about this post