Pas thuajse katër vjetësh, Gjykata Kushtetuese ka hedhur poshtë zyrtarisht kërkesën e Shoqatës së Bashkive për ti deklaruar si antikushtetuese zgjedhjet e 30 qershorit. Me këtë vendim, gjykata certifikoi mbajtjen e zgjedhjeve për pushtetin lokal pa pjesëmarrjen e opozitës.
Shoqata e Bashkive, me në krye Voltana Ademin, kërkoi konstatimin antikushtetues të procesit zgjedhor të zhvilluar në 30 qershor 2019 për zgjedhjen e organeve të qeverisjes vendore, të kryetarëve të bashkive dhe anëtarëve të këshillave bashkiakë, dhe si rrjedhojë konstatimin antikushtetues të zgjedhjes së anëtarëve të këtyre organeve. Kërkesa tjetër ishte verifikimi kushtetutshmërisë së veprimtarisë së partisë Bindja Demokratike në lidhje me regjistrimin e saj në gjykatë dhe zgjedhjet e datës 30 qershor 2019.
Sot Gjykata Kushtetuese ka publikuar vendimin e arsyetuar ku thotë se “Gjykata vlerëson se në lidhje me kërkimin e parë të kërkesës në shqyrtim çështja nuk bën pjesë në juridiksionin kushtetues, kurse në lidhje me kërkesën e dytë, kërkuesja nuk legjitimohet për të vënë në lëvizje gjykimin kushtetues”.
Argumenti tjetër i Gjykatës Kushtetuese është moslegjitimi i kërkueses, Voltana Ademi, e cila nuk kishte të drejta të vinte në lëvizje Gjykatën Kushtetuese.
“Për verifikimin e kushtetutshmërisë së partive dhe të organizatave të tjera politike, si dhe të veprimtarisë së tyre, sipas nenit 57 të ligjit nr. 8577/2000, Gjykata vihet në lëvizje me kërkesë të Presidentit të Republikës, të Kryeministrit, të jo më pak se një të pestës së deputetëve, të Avokatit të Popullit dhe të Kryetarit të Kontrollit të Lartë të Shtetit. Për rrjedhojë, në lidhje me këtë kërkim kërkuesja nuk legjitimohet për arsye personale, duke qenë se nuk bën pjesë në rrethin e subjekteve që mund të vënë në lëvizje Gjykatën për ushtrimin e kompetencës së saj të parashikuar në nenin 131, pika 1, shkronja “d”, të Kushtetutës”, thuhet në vendimin e Gjykatës Kushtetuese.
Komisioni i Venecias la në fuqi zgjedhjet e 30 qershorit 2019 dhe i kërkoi Gjykatën Kushtetuese të mos përsërisë ato. Në dokumentin e Vencias thuhet se bojkoti i partive (siç bëri PD në 2019) nuk është arsye që zgjedhjet të mos mbahen çdo 4 vjet siç është periodiciteti i tyre.
Discussion about this post