Është mbyllur takimi i vlefshëm për vendin e tretë të UEFA Nations League, mes Holandës dhe Italisë, me fitoren e djemve të Roberto Mancinit, me rezultatin 2-3.
Në këtë takim, miqtë ishin pak më të motivuar për të bërë një ndeshje të mirë, në krahasim, me “tulipanët”, të cilët duket, se ende nuk e kishin rimarrë veten nga humbja përballë Kroacisë, në gjysmëfinale.
Rezultati i takimit, të luajtur në Enshede, u zhbllokua në minutën e 6’, nga lojtari i Interit, Dimarco, i cili goditi në mënyrë të shkëlqyer nga brenda zonës, duke mos i dhënë asnjë mundësi portierit holandez, për të pritur topin.
Goli i pësuar, në vend se të motivonte holandezët për të reaguar, i demoralizoi totalisht.
Italianët dyfishuan, në minutën e 20’, me anë të Frattesit.
Me avantazhin prej dy golash, u mbyll pjesa e parë e takimit.
Në pjesën e dytë, Koeman, zëvendësoi tre lojtarë që në fillim, duke aktivizuar Berguijn, Vijnaldum dhe Veghorst.
Njëri nga të aktivizuarit në pjesën e dytë, Berguijn, rihapi takimin në minutën e 68’, duke shënuar golin e përgjysmimit të diferencave. Megjithatë, italianët u kundërpërgjigjën menjëherë duke shënuar në minutën e 73’, falë sulmuesit anësor të Juventus, Chiesa.
Lodhja fizike te kampionët e Europës në fuqi, filloi të ishte më evidente, me Holandën që përfitoi duke realizuar fillimisht me anë të Veghorst, por goli u anulua nga VAR, për një pozicion jashtë loje.
Goli i dytë i vendasve, erdhi vetëm në minutën e fundit të kohës së rregullt, falë Vijnaldum.
Gjatë 9 minutave shtesë të akorduara nga gjyqtari, Holanda nuk arriti të shfrytëzonte ato pak raste të krijuara, duke e mbyllur me humbje, aventurën në Nations League.
Për Italinë, kjo është medalja e dytë e bronztë, në këtë kompeticion, pas asaj të vitit 2021.
Discussion about this post