Homazhe të përbashkëta për nxënëset, i afërmi: E rëndë, vrasësi endet i lirë

Familjarët e dy nxënësve të vrarë nga sulmi me armë zjarri në Gllogjan të Deçanit kanë pritur homazhe të përbashkëta për dy fëmijët e tyre.

I afërmi i të ndjerës që mbeti viktimë e sulmit Binak Mustafa thotë për mediat se çdo minutë për ta është i rëndë, për sa kohë autori që kreu krimin e trefishtë vijon të jetë në arrati.

“Çdo minutë  i humbur që nuk marrim informata për ne është i rëndë, derisa të zbulohet kush e ka bërë ne jemi të tronditur, kur zbulohet personi në fjalë”, ka deklaruar ai.

Ai ka deklaruar se nxënësit e tjerë që ishin në autobus kur ndodhi ngjarja nuk janë në gjendje të mirë emocionale.

“Të gjithë janë në gjendje të keqe shëndetësore, ata janë të tmerruar kanë marrë trajtime mjekësore edhe njerëzit që kanë shkuar aty menjëherë për të ndihmuar janë të tmerruar”, ka thënë Mustafa.