Komuniteti i futbollit tiranas ka përcjellë sot për në banesën e fundit legjendën Osman Mema, ish-futbollistin e njohur të Tiranës dhe Partizanit, i cili u nda nga jeta një ditë më parë në moshën 84-vjeçare.
Në homazhet e organizuara sot në hollin e stadiumit “Selman Stërmasi” të Tiranës kanë marrë pjesë edhe Sekretari i Përgjithshëm i FSHF-së, Ilir Shulku, Zv.Presidenti i FSHF, Lutfi Nuri, anëtari i KE-së së FSHF, Bardhyl Jera si edhe përgjegjësi i Departamentit të Eventeve, Tritan Kokona.
Pasi vendosën kurora me lule dhe u përulën me respekt para arkivolit, duke u shprehur ngushëllimet familjarëve të ish-futbollistit të njohur, Sekretari i Përgjithshëm i FSHF-së, Ilir Shulku tha në një prononcim për median se futbolli humbi një personalitet të madh dhe me shumë tituj në karrierën e tij të lavdishme.
“Sot është një ditë zie për futbollin shqiptar. Kemi humbur një legjendë si Osman Mema, një nga pinjollët më të famshëm të dinastisë Mema, që i ka dhënë kaq shumë futbollit në dekadat e fundit. Për Osmanin mund të flasësh gjatë, pasi ka pasur një karrierë plotë me arritje dhe suksese.
Një personalitet i nderuar me titullin ‘Legjenda e Futbollit Shqiptar’ nga Federata Shqiptare e Futbollit pesë vite më parë, me titullin ‘Mjeshtër i Madh’ nga Presidenti i Republikës së Shqipërisë si dhe shtatë herë Kampion i Shqipërisë me fanellat e Tiranës dhe Partizanit. Përveç të tjerave ai ishte një qytetar model dhe me vlera të mëdha.
Në emër të FSHF-së, Presidentit Duka dhe komunitetit të futbollit, dua t’i shpreh ngushëllimet më të sinqerta familjes Mema, të afërmve dhe miqve të tyre për këtë humbje të madhe. I përjetshëm qoftë kujtimi i tij!”, – tha Sekretari Shulku.
Discussion about this post