Deputeti nga radhët e Lidhjes Demokratike të Kosovës, Avdullah Hoti ka reaguar pas deklaratës së presidentes Vjosa Osmani, e cila duke iu përgjigjur presidentit francez Emmanuel Macron, tha se është mënyra më e mirë për ta vrarë procesin e dialogut njëherë e përgjithmonë nëse zbatohen paralajmërimet e kreut të Francës, siç është ai për shqyrtimin e regjimit të vizave për Kosovën dhe Serbinë.
Përmes një postimi në Facebook, Hoti duke iu referuar liderëve institucionalë të Kosovës, theksoi se “këta demagogë heqin dorë nga dialogu për njohje reciproke, që kishte nisur në qeverinë paraprake në koordinim me aleatët, e që zhvillohej në Bruksel e Uashington”.
Sipas Hotit krerët e shtetit tani ankohen e “kërcënojnë” aleatët pse ata po i kushtëzojnë proceset euro-integruese të Kosovës me respektim të kësaj marrëveshje.
”Këta demagogë heqin dorë nga dialogu për njohje reciproke, që kishte nisur në qeverinë paraprake në koordinim me aleatët, e që zhvillohej në Bruksel e Uashington.
Dialogun e zhvillojnë skutave, hoteleve të plazheve e në darka private.
Arrijnë marrëveshje të përkohshme në villën e Titos në Ohër, ku marrin obligime për autonomi për serbët dhe zbatim të asociacionit, të cilin e kishin kundërshtuar dhunshëm, në këmbim të disa obligimeve gjysmake, abstrakte e të paverifikueshme që pala serbe duhet të përmbushë.
E tash ankohen e “kërcënojnë” aleatët pse ata po i kushtëzojnë proceset euro-integruese të Kosovës me respektim të kësaj marrëveshje.
Shtetin e Kosovës e ruajt Zoti, se zot shtëpie nuk ka momentalisht!”, shkruan Hoti./Tema
Discussion about this post