Gazetari investigativ, Artan Hoxha, tha mbrëmjen e sotme në emisionin “Të Paekspozuarit” se referuar dëshmisë së Marjus (Artan) Tafanit, grupi i Laret Haxhiajt ka vepruar brenda territorit shqiptar dhe kryesisht për vrasjet.
Hoxha tha se zbulimi i këtij grupi mund të çojë te grupimet e tjera, ato që merren me narko-trafikun.
“Marjus Tafani ka folur për prokurorët dhe gjyqtarët që kanë hetuar grupin e Laert Haxhiut. Merita Selimi ka hetuar atë që njihet si masakra e Lushnjes dhe më pas çështja ka kaluar në SPAK ku është hetuar nga prokurorja Musabelliu.
Në hetimet që janë bërë ndaj Laert Haxhiut dhe dy njerëzve të tij më të afërt, ka pasur shumë presione ndaj Policisë, Prokurorisë dhe Gjykatës, që këta persona të kishin lehtësi në dënim”, tha Hoxha.
Sipas tij, plani për të goditur prokuroret ka mbetur thjesht në fazën e një bisede, pasi nuk ka të dhëna që të kemi pasur veprime apo një avancim në këtë plan.
“Duhet të keni parasysh faktin se Prokurorët apo Gjyqtarët në Shqipëri i mbron ajo korniza se janë të paprekshëm, jo se i mbron policia apo truprojat.
I vetmi gjyqtar i vrarë në një atentat është Skerdilajd Konomi, ndërsa atentati i vetëm ndaj një prokurori është rasti i Durrësit. Nuk kemi asnjë rast tjetër. Tani referuar dëshmisë që ka dhënë Marjus Tafani ai thotë se është bërë një bisedë, por skemi prova të tjera që çfarë ka ndodhur me këtë plan. Ndoshta goditja nuk ëhstë realizuar për shkak se grupi i Laert Haxhiajt pati disa goditje. U shpërbë grupi, pati arrestime, Laert Haxhiaj ndodhet në burg në Greqi, grupi i Pogradecit iu shpërbë, dy njerëzit më të afërt iu arrestuan”, tha Hoxha.
Discussion about this post