IKMT ka zbarkuar sërish në Jalë duke krijuar tension me banorët. Ata kanë injoruar apelin e këtyre të fundit të cilët edhe ditën e djeshme kanë kundërshtuar me forcë prishjen e objekteve, pasi IKMT nuk kishte njoftuar për ndërhyrjen.
Banorët shprehen se njoftimi për ndërhyrjen e fadromave nuk u kanë ardhur më herët ndërsa theksojnë se këto lajmërime janë bërë në mometin e fundit.
Ata thonë se u ka ardhur vetëm lajmërim dhe jo njoftim. Sipas tyre nuk jepet njoftimi në momentin e fundit por 10 ditë përpara. Të revoltuar ata pretendojnë se vendimi për prishjen e ndërtesave nuk është vendim gjykate dhe është një vulë e thatë.
“Jep njoftimin, pas 10 ditësh hajde prishe të gjithën çfarë sheh këtu. E para e punës, kjo nuk është vulë e thatë, është fotokopje. Dua njoftimin nuk dua lajmërimin. Më sill njoftimin o zotëri, pas 10 ditësh hajde prishe nëse ne nuk jemi në rregull. Jemi i 10-ti si muaj, e ke datën gabim, e ke gabim”
Ndërkohë pronarja e objekteve që IKMT kërkon të prishë në Jalë është shprehur se nuk kishte pasur asnjë lloj njoftimi sa i përket prishjes së objekteve, vetëm për pastrim inertesh. Më tej ka shtuar se dokumentacioni për ndërtesën nuk është në kundërshtim me ligjin dhe se kanë paguar çdo lloj takse.
“Para dy ditësh erdhën dhe na thanë se do të pastronin inertet dhe nuk u mjaftuan me kaq por erdhën dhe na prishën një objekt që ne e përdornim si restorant. Për objektin ne kishim fituar një gjyq, por zotërinjtë që erdhën nuk donin t’ia dinin për asgjë. Më pas na thanë se do prishnin edhe një objekt banimi.
Këta zotërinjtë na thonë që ti heqim edhe makinat që kemi lënë aty. Nëse shteti ka një informacion se ne nuk kemi fituar diçka me djersën e ballit, të vijë e të na fusë në burg. Edhe një kriminel ka të drejta para ligjit, jo më ne që jemi të rregullt dhe kemi paguar çdo lloj takse.
Sipas ligjit të shtetit, edhe sikur mos të kesh letra të vjen vendimi apo njoftimi disa ditë para. Tani dua të njëjtën gjë, të më jepet njoftimi më para dhe më pas sipas ligjeve të shtetit të vazhdojë prishja, le të vijnë ta prishin. Nuk kërkojmë asgjë tjetër, vetëm zbatimin e ligjit. Këtu neve po na trajtojnë si të jemi kafshë jo njerëz”, u shpreh pronarja e objektit.
Është hera e dytë që IKMT brenda dy ditësh zbarkon me dhunë në banesat e qytetarëve në Jalë.
