Për pak distancë nga rutina dhe stresi i punës ia vlen të pushosh mirë edhe nëse të duhet të marrësh një kredi. Trendi i pushimeve me kredi jo vetëm jashtë por edhe brenda vendit, vijon edhe këtë vit, edhe pse përballja me burokracitë, interesat e ndryshueshme, por dhe ngjarjet e ndodhura me mikrokreditë i ka “frikësuar” qytetarët.
“Ka familje që duan t’i kënaqin fëmijët por të marrësh kredi për pushime është e vështirë. Ndoshta mund të shkosh në pushime më të lira”. “Kredinë do e merrja për të shkolluar fëmijët më shumë”, thonë disa prej tyre.
E kundërta ndodh me të huajt që vizitojnë Shqipërinë, të shtuar ndjeshëm në numër veçanërisht dy vitet e fundit. Për ta është e panevojshme të pushosh me kredi në Shqipëri. “Ne përdorim kursimet tona. Por mesa shohim Shqipëria është një vend shumë i lirë dhe nuk harxhojmë shumë”. “Unë jam nga Arabia Saudite. Unë përdor kursimet e mia për të udhëtuar. Por shoh që Shqipëria nga viti në vit po bëhet më e shtrenjtë por ende është e përballueshme”. “Ne na pëlqejnë të udhëtojmë. Si të rinj që jemi do e mendonim edhe të merrnim kredi për pushime”.
E teksa mes shqiptarësh dikush pushon me kursime, dikush me kredi, shumë te tjerë as nuk e mendojnë dot largimin nga shtëpia për disa ditë. Në anketimet e realizuara nga Barometri i Ballkanit rezulton se 60% e shqiptarëve nuk e përballojnë as një javë pushime. “Me këtë ekonomi që është nga pragu dhe Brenda shtëpisë nuk kemi mundësi”. “Këtë verë e kemi pushim pasi nuk kemi mundësi ekonomike sapo kemi blerë një apartament dhe do mendojmë për vitin tënd”.
Në vitin 2023, pavarësisht krizës së çmimeve dhe inflacionit të lartë, shqiptarët, sipas të dhënave të Bankës së Shqipërisë, shpenzuan 235 miliardë lekë për udhëtime jashtë vendit. Ku kulmi u regjistrua në muajt korrik-shtator dhe më pak në fillim vit.
Discussion about this post