Covid-19 i ka marrë jetën 28-vjeçares e cila ishte edhe shtatzënë. Ngjarja e rëndë është regjistruar në Kosovë ku Liberta Selaci Hasani pasi u infektua me koronavirus humbi jetën bashkë me foshnjën që rritje brenda saj. Mësohet se e reja nuk kishte sëmundje të tjera bashkëshoqëruese dhe se gëzonte shëndet të plotë deri në momentin që u infektua me virusin e rrezikshëm.
Për ndarjen e saj nga jeta ka reaguar edhe Sellma Kasumoviq, një emër i njohur si make up artist në Kosovë edhe për shkak të miqësisë me disa personazhe të njohura të botës së artit.
“Kolegia ime, grimerja Liberta Selaci, 28-vjeçare dhe shtatzënë sot humbi jetën nga virusi. U prehtë në paqe ajo bashkë me foshnjën e palindur. Zoti ua lehtësoftë miqve në këto çaste të vështira! Raste si ky dhe të tjera për çdo ditë, le të jenë thirrje për vaksinim. Ju lutem shpirtërisht dhe sinqerisht. Virusi nuk po njeh moshë”, shprehet ajo.
Gjatë orëve të mbrëmjes para teatrit në qytetin e Vushtrisë janë ndezur qirinj në kujtim të 28-vjeçares.
Anesteziologia në Repartin e Mjekimit Intenziv, Agreta Gecaj-Gashi tha për mediet në Kosovë se 28-vjeçarja prej tre ditësh ishte e shtruar në këtë repart.
“Pacientja në Mjekimin Intenziv është trajtuar tri ditë. Për fat të keq kanë përfunduar me fatalitet nëna dhe foshnja e saj…Ajo nuk ka pasur sëmundje tjera shoqëruese”.
Ajo shton se në Mjekimin Intensiv janë të shtruara edhe dy paciente të tjera në shtatzëna, të cilat janë në gjendje shumë të rëndë shëndetësore.
