Një 28-vjeçare shtatzënë nga Vushtrria ka humbur jetën pas infektimit me Covid-19. Bëhet fjalë për Liberta Selacin nga Kosova, me profesion grimere.
Lajmin për vdekjen e saj e kanë bërë të ditur familjarët e të ndjerës, përmes një mesazhi prekës në rrjetet sociale. Ata bëjnë të ditur se varrimi bëhet sot në varrezat e fshatit në prezencë të familjarëve të ngushtë.
“Liberta na la, mbrëmë vonë ia dorëzoi shpirtin Krijuesit fuqiplotë bashkë me beben, qe kishte në barkun e saj e që e donte aq shumë.
Liberta, më e mira prej nesh, luftoi shumë, por nuk ia doli.
Shpirtin na e këputi, duke na lënë një varr të hapur për tërë jetën në loçkën e zemrës sonë.
Liberta, për shpëtimin e së cilës u lut i tërë qyteti, e tërë shoqëria e familja jonë, do të mbetet kujtimi më i mirë e më i dashur në jetët tona. Pusho e qetë me bebushin tënd, e neve na prit atje, në Xhenetet e Allahut”, shkruajnë familjarët në Facebook.
Kujtojmë se situata si pasojë e virusit në Kosovë është e rëndë, ku vetëm ditën e djeshme ndërruan jetë 26 persona dhe u infektuan qindra të tjerë.
