Avioni bombardues i Rusisë Su-34 u përplas në një bllok banimi duke shkaktuar një zjarr të madh. Për pasojë humbën jetën 15 persona. Ndërkohë, mësohet se shkak i rrëzimit janë bërë dy pulëbardha, të cilat janë futur në motorin e mjetit.
Këto janë përfundimet në të cilat kanë dalë hetimet e kryera për rastin.
Bombarduesi luftarak po ngrihej nga një fushë ajrore në qytetin jugor rus të Yeysk, pranë kufirit me Ukrainën, të hënën në mbrëmje kur u rrëzua disa çaste më vonë me një motor në zjarr. Avioni u përplas në tokë përpara një bllok banimi ndërsa në godinë mori flakë karburanti i derdhur.
Të dy pilotët arritën të katapultoheshin nga mjeti fluturues përpara përplasjes. Një prej tyre madje është filmuar në momentin që largohet nga avioni me parashutë.
Sipas hetuesve, në motor u futën dy pulëbardha gjatë ngritjes. Agjencia e lajmeve TASS raportoi: “Pjesë nga kockat e shpendëve u gjetën gjatë skanimit të rrënojave të avionit.”
Discussion about this post