Një aksident i rëndë ndodhi ditën e sotme rreth orës 15:30 në rrugën nacionale Gjirokastër-Sarandë, në vendin e quajtur Muzinë, ku për pasojë pesë persona kanë humbur jetën.
Furgoni i cili drejtohej nga shoferi Bardhi Proda dhe kryente linjën Tiranë-Sarandë u përplas me mjetin tip “Land Rover” me drejtuese Rexhina Çelhalka. Parakalimi i gabuar i “Land Roverit” shkaktoi përplasjen dhe si pasoj furgoni me 6 pasagjer në të, ka përfunduar në humnerë duke rënë nga një lartësi prej 25 metrash.
Nga përplasja kanë humbur jetën shoferi Bardhi Proda 51 vjeç me 4 pasagjerët, çifti i bashkëshortëve Fiqiri e Drite Korçari, 77 dhe 72 vjeç banues në Tiranë, si dhe një çift nga Ukraina, Olesander dhe Tetiana Fediaieva, 53 dhe 48 vjeç. E vetmja e mbijetuar në furgon ka mbetur Greta Kaberdini, 25 vjeçe e cila është edhe shtatzënë, por fatmirësisht ajo dhe bebja i kanë shpëtuar rrezikut.
Ndërsa nga mjeti “Land Rover” janë lënduar lehtë drejtuesja e mjetit, 22-vjeçarja Rexhina Çelhaka, banuese në Tiranë, si dhe Ana Koskovila, 23 vjeçe dhe Giulia Parimi, 22 vjeçe, banuese në Itali. Mësohet se 22-vjeçarja e kishte marrë mjetin me qira.
Policia mbërriti në vendin e aksidentit ku stabilizoi trafikun i cili për afro 2 orë ka qenë tejet i rënduar. Furgoni u la në vendin ku u rrëzua pasi vinçi nuk mundi dot ta nxirrte për shkak të vendit te keq ku kishte rënë. Policia dhe grupi hetimor morën çdo material nga automjeti, për verifikime të mëtejshme.
Segmenti ku ndodhi ngjarja, vetëm në disa vende ka mbrojtëse betoni dhe jo mbrojtëse metalike sikurse është edhe standardi për sigurinë rrugore.
