Ministrja e Ekonomisë, Delina Ibrahimaj, raportoi pas mbledhjes së Këshillit të Ministrave se është vendosur të shtyhet afati për zbatimin e programit, për punësimin e atyre që humbën vendin e punës, si pasojë e pandemisë së Covid.
“Sot u miratua një ndryshim në një vendim të mëparshëm, që përcakton kriteret dhe rregullat për zbatimin e programeve të nxitjes së punësimit, për ata që mbetën pa punë si pasojë e Covid-19. Përmes këtij ndryshimi, ne shtyjmë afatin e zbatimit të programit deri në vitin 2023. Qeveria mori disa masa për mbështetjen e të punësuarve dhe të atyre që dolën nga tregu i punës” ,tha ministrja.
Ibrahimaj ka dhënë detaje për paketën që pritet të prezantohet lidhur me situatën e krizës enegjitike në vend, ku u pyet nga gazetarët se sa do t’i kushtojë shtetit shqiptar blerja e energjisë.
“Paketa do të marrë parasysh efektet e rritjes së çmimit. Paketa po merr parasysh edhe efektet e raundit të dytë. Në Shqipëri nuk është përcjellë ende rritje e çmimit. Ne jemi duke vëzhguar. Paketa e cila do të prezantohet do të marrë parasysh si efektet direket dhe ato indirekte. Kjo nuk asnjë korrelacion ekonomik me projektin e amnistisë fiskale. Ministrja e Energjitikës është duke punuar me kompanitë në varësi të saj që të bëjë një planifikim sa më të qartë. Në një dalje brenda kësaj jave do të merrni informacion mbi të gjitha nevojat dhe masat që do të marrim me qëllim që të përballojmë këtë krizë që do të impaktojë jo vetëm në buxhetin e këtij viti, por dhe në atë të vitit 2022,” u shpreh ministrja.
Më herët, zv. kryeministri Arben Ahmetaj tha se kryeministri Rama ka ngritur një grup punë për bizneset e vogla dhe familjet në nevojë, për t’i ndihmuar në përballimin e rritjes së energjisë elektrike.
