Trupi i Ali Mustashari, 65-vjeçari, që humbi jetën në kampin e MEK në Manzë, është transportuar në morgun e Tiranës, atje ku do ti nënshtrohet ekspertizës mjeko-ligjore.
Do të jetë kjo e fundit që do të përcaktojë shkakun e vdekjes së 65-vjeçarit, i cili humbi jetën gjatë mësymjes që forcat special të Policisë së Shtetit bënë në kampin ku prej vitesh strehohen muxhahedinët iranianë.
Sipas mjekëve iraninë, që shërbejnë në kamp, 65-vjeçari humbi jetën si pasojë e gazit që përdori policia, por kishte edhe një goditje në pjesën ballore të kokës. Fillimisht u tha se ai mund të kishte pësuar atak kardiak, por ekipi i mjekëve iranianë në kamp, e përjashtojnë si mundësi.
Ndërkohë, Policia e Shtetit nuk ka konfirmuar rastin e vdekjes së 65-vjeçarit.
Hetimet lidhur me ngjarjen drejtohen nga Prokurori Sokol Nishani, i cili ka kqyrur trupin e pajetë në spitalin e ngritur brenda kampit MEK dhe më pas ka urdhëruar që të kryhet ekspertiza mjeko-ligjore.
Gjithashtu janë mbledhur dëshmitë nga mjekët që shërbejnë në kamp, por edhe nga persona të pranishëm, në momentin që ka ndodhur ndërhyrja.
Avokati Genc Gjokutaj, i kontaktuar nga MEK, si mbrojtës i tyre ligjor, ka konfirmuar se në trupin e viktimës ka pasur hematoma, ndërkohë që tha do të pritet ekspertiza për të zbuluar shkakun e vdekjes. Gjokutaj e konsideroi si një tjetër gabim të madh faktin se Policia e Shtetit mohon që në kamp ka një viktimë, ndërkohë që si pasojë e përdorimit të sprite djegës dhe gazit, janë dëmtuar rreth 50 persona të tjerë, banorë të kampit.
Discussion about this post