Anëtari i Këshillit Kombëtar të Partisë Demokratike, Indrit Vokshi, ka dhënë dorëheqjen nga posti që mbante pas humbjes së PD në zgjedhjet e pjesshme lokale, nga ku doli si forcë e tretë politike pa siguruar asnjë bashki.
Vokshi në reagimin e tij të gjatë, thotë se vendimin e ka marrë duke u gjykuar ftohtë, pa ndikimin e askujt, ndërsa nuk kursen kritikat ndaj Sali Berishës dhe Lulzim Bashës.
Partia Demokratike nuk mori as shumicën e votës së saj tradicionale. U morën aq vota sa mundën të marrin kandidatët. Shumica e elektoratit të djathtë dhe gri, bojkotoi zgjedhjet, pati pjesëmarrje 30% dhe kjo tregon se njerëzit nuk denjuan as të dalin të shkojnë deri tek kutia “për ne”. Në këshill kemi bërë marrëzira, jemi bërë noterë dhe dorëngritës të planeve Berisha-Basha-Meta për rrëzim me djegie mandatesh e bojkot të bashkive, kemi marrë pjesë në katastrofë. Kemi pasur bazament sepse militantizmi ku ne mbështeteshim, ka qenë pro këtyre veprimeve. Pra ia kanë bërë vetes, përmes nesh. Tani militantizmi e ka tërhequr besimin e vet, gjykoj se për mua nuk ka vullnet njerëzish që të më mbajë dhe të më legjitimojë në strukturë e në Këshill. Nga ana tjetër nuk pati njerëz votues përtej militantizmit të cilët dje t’i jepnin legjitimitet strukturës sonë me votë dhe ta zëvëndësonin vullnetin që u tërhoq mbrapsht dhe iku tek Berisha e Meta, me vullnet tjetër. Që të kem legjitimitet për të ndejtur në një forum dhe për të folur në emër të një forumi, duhet të më zgjedhë një masë tjetër njerëzish, një strukturë tjetër partie dhe një anëtarësi tjetër. Nëse ndodh kjo, nëse vjen dita që PD gjen terren të ri, mund të flasim”, shkruan ai ndër të tjera.
Në fund të fjalës, ai shkruan se nuk do t’i bashkohet lëvizjes së Berishës, ndërsa një thirrja ka dhe për gazetarët që të mos e ftojnë nëpër intervista, pasi shton se nuk ka asgjë për të thënë.
Discussion about this post