Sulmuesi i Bayern Mynih, Harry Kane, i ka bërë thirrje skuadrës së tij që të vazhdojë të luftojë për kualifikimin në Champions League, pavarësisht humbjes 0-1 në sfidën e parë në Romë ndaj Lazio. Penalltia e Ciro Immobile i dha Lazios një fitore në ndeshjen e parë të 1/16-tës.
“Kjo ka qenë një javë vërtet e vështirë, me dy humbje radhazi. Në Champions, ne e filluam mirë dhe patëm shanse të qarta. Edhe një shans për mua. Në këto ndeshje, ato janë momente të mëdha që duhen shfrytëzuar”, tha Kane për “TNT Sports”.
“Pjesa e dytë ishte zhgënjyese. Ne dolëm me më pak energji dhe më pak vetëbesim. U ndëshkuam, pasi të luash në 10 lojtarë është gjithmonë e vështirë. Duhet ta gjejmë mes vete forcën për t’u ringritur. Jemi ende në garë për Bundesligën dhe ende në këtë turne. Duhet të vazhdojmë të luftojmë”, u shpreh sulmuesi anglez.
“E pranoj se jemi në një periudhë të vështirë, por duhet të luftojmë. Duhet ta përmbysim rezultatin në ndeshjen e kthimit. Ne kemi bërë lojëra të mëdha dhe gjëra të bukura për të ardhur deri këtu. Nuk jemi eliminuar ende, nuk do të dorëzohemi kurrë. Një moment ose një shkëndijë mund ta kthejë fatin”, tha Harry Kane.
Discussion about this post